Ministru Transporte no Komunikasaun, José Agostinho da Silva. Imajen Tatoli/Egas Cristovão

DILI, 13 outubru 2020 (TATOLI)–Ministru Transporte Komunikasaun, José Agostinho da Silva, informa ekipa téknika interministeriál finaliza ona dokumentu projetu kabu submarinu no sei aprezenta ba Konsellu Ministru (KM).

“Kona-ba asuntu kabu submarinu, ekipa téknika kompostu hosi liña ministériu sira haree ona asuntu ne’e no finaliza ona dokumentu balun no tuir planu sei aprezenta ba Konsellu Ministru iha tempu badak,” tenik Ministru José Agostinho, hafoin enkontru ho Primeiru-Ministru, Taur Matan Ruak, iha Palásiu Governu, tersa ne’e.

Notísia Relevante: Governu hahú diskute implementasaun projetu kabu submarinu fibra ótika

Governante ne’e hatutan, sistema telekomunikasaun iha Timor-Leste lentu tebes tanba ne’e Governu haka’as-an aselera projetu estratéjiku fibra óptika.

“Durante ne’e ita-nia rede fornesimentu internet sai preokupasaun públiku tanba velosidade  ne’e lentu tebes, entaun asuntu ne’e mak sai preukupasaun ita-nia,” nia realsa.

Antes ne’e, Ministru José Agustinho, informa kada tinan Governu selu satelite hamutuk millaun $120 no orsamentu ne’e hatodan tebes Orsamentu Jerál Estadu (OJE).

Daudaun ne’e, banda internet internasioál ne’ebé maka Timor-Leste iha ho kapasidade 6 Gigabyte/second, ne’ebé fahe ba populasaun iha territóriu tomak ne’ebé asesu ba internet liuhosi operadór Timor-Telecom, Telkomcel no Telemor.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here