DILI, 13 outubru 2020 (TATOLI)–Tribunál Distritál Dili (TDD), iha setembru, tinan ne’e, realiza julgamentu móvel iha Munisípiu Liquiçá ba prosesu kazu hamutuk hitu (7).
Notísia Relevante : Tribunál Móvel Konsege Redús Prosesu Pendente Barak
“Fulan kotuk, ita hala’o julgamentu móvel ba iha Liquiçá ba kazu hitu no ba kazu sira-ne’e iha desizaun hotu,’’ Juiz informa Administradór TDD, Afonso Carmona iha nia kna’ar fatin, ohin, iha Mandarin, Dili.
Nia hateten, kazu sira-ne’e ho tipu hanesan violénsia doméstika ne’ebé iha desizaun balu hetan pena suspensaun, no balu omóloga.
Afonso Carmona subliña, julgamentu móvel parte ida atu redúz prosesu ne’ebé tama no aselera prosesu pendente sira.
Julgamentu móvel ne’e TDD kobre area Dili no área seluk mak hanesan Munisípiu Ermera, Liquiça no Aileu, ho objetivu hodi justisa hakbesik ba povu, liuliu ba vulnerável sira ho natureza kazu violénsia doméstika no seluk ne’ebé envolve ema vulnerável laiha transporte to’o mai iha Dili.
Juis Afonso Carmona hateten, tau ona planu hodi identifika iha área hanesan iha Atsabe, Hatulia, Maubara, Aileu parte besik ba Maubisse, Lekidoe nian ne’ebé iha populasaun ho problema transporte tanba ne’e sei fasilita julgamentu to’o suku ne’ebé nesesáriu duni.
Jornalista: Nelson de Sousa
Editór: Francisco Simões
