Prezidente Repúblika, Francisco Guterres Lú Olo. Imajen António Gonçalves

DILI, 13 outubru 2020 (TATOLI)—Prezidente Repúblika (PR), Francisco Guterres ‘Lú Olo’, preokupa ho sosiedade ne’ebé desonra ba feto maluk sira.

Preokupasaun ne’e Xefe Estadu hato’o durante audiénsia ho estrutura Plan Internasionál Timor-Leste (PITL), ne’ebé lidera hosi Diretora, Dillyana Ximenes, akompaña mós ho labarik feto no mane hamutuk na’in-neen (6), iha Palásiu Prezidensiál Nicolau Lobato, Bairru-Pité, Díli.

Komunikadu ne’ebé Ajénsia TATOLI asesu hosi mídia Palásiu Prezidensiál ne’e haktuir, Xefe Estadu preokupa tebes ho sosiedade liuliu sosiedade ida agora ne’ebé desonra feto maluk sira no Xefe Estadu apela hodi dignifika no respeitu feto sira, Timor-Leste sei iha futuru.

Nota komunikadu ne’e hateten, iha loron 30 fulan juñu tinan ne’e, PITL asina Memorandu Entendimentu ho Prezidénsia Repúblika hodi halo kooperasaun iha promosaun igualdade jéneru, hapara violénsia no diskriminasaun hasoru labarik feto no feto enjerál.

“Prezidente Repúblika apoiu inisiativa sira ne’ebé PITL halo relasiona ho kampaña ‘Freedom Online”, nune’e labarik-feto no feto-klosan sira bele sente seguru asesu ba media sosiál,”  komunikadu ne’e haktuir.

Iha kooperasaun ne’e mós konkorda, Espoza Prezidente Repúblika, Cidalia Lopes Nobre Mouzinho Guterres, sai nu’udár Embaixadora ba Kampaña “Impaktu Negativu Hosi Kaben Sedu no Isin Rua Sedu no mós Hapara Violénsia Hasoru Labarik, Labarik Feto no Feto iha Timor-Leste”.

Imajen/Media PR.

Ba Xefe Estadu, Diretora Dillyana Ximenes, relata kona-ba komemorasaun Loron Internasionál ba Labarik-feto iha tinan ida-ne’e, ne’ebé PITL hamutuk ho nasaun 22 selebra hodi lansa mós kampaña ‘Freedom Online’ ho objetivu halakon asédu no abuzu ba labarik-feto no feto-klosan sira iha média sosiál.

Iha oportunidade ne’e, reprezentante labarik feto nasaun 22 ho naran Cecilia Mendonça Nascimento, lee karta aberta ‘Freedom Online’ ba Prezidente Repúblika. Iha karta ne’e hakerek ba kompañia media sosiál sira hanesan Instagram, Facebook, Twitter no Tik Tok atu kria mekanizmu ne’ebé seguru liu ba labarik-feto no feto-klosan sira.

Iha karta ne’e haktuir, kona-ba abuzu online ne’ebé labarik feto sira hasoru. Cecilia Mendonça haktuir katak, peskiza ne’ebé halo tiha ona ba labarik feto hamutuk 14.000 iha nasaun 22, hatudu katak 50% labarik-feto sira hetan asédu online no 42% lakon konfiansa tanba asédiu online.

Tanba ne’e, sira husu ba Prezidente Repúblika no ema hotu-hotu atu hola parte iha kampaña ne’ebé halo daudaun. PITL nu’udár organizasaun umanitária internasionál ida ba dezenvolvimentu komunitáriu ne’ebé sentradu ba labarik sira, liuliu realiza direitu labarik feto, ne’ebé la ho afiliasaun relijioza, polítika no la haree ba tinan, orijen étniku, rasa, kondisaun fízika, mentál no kondisaun sósiu-ekonómiku.

PITL servisu ona iha Timor-Leste dezde tinan 2001 no atualmente iha programa ne’ebé foka iha Munisípiu Aileu ho Ainaro no suporta intervensaun projetu espesífiku iha Munisípiu Lautém, Ermera no Dili.

Jornalista: Cipriano Colo

Editór: Câncio Ximenes

HAKEREK NO HATÁN

Please enter your comment!
Please enter your name here