DILI, 13 outubru 2020 (TATOLI)—Koordenadora Lalibur Borja, Milena da Silva hateten, ohin, Lalibur Borja sei halo lansamentu ba livru “Francisco Borja da Costa: Poeta, Jornalista no Ativista” iha Centro Nacionál Chega, Antigu Komarka, Balide, Dili.

Nia hateten, Lalibur Borja nu’udár komisaun organizadora ida-ne’ebé kompostu hosi individu no organizasaun sira ne’ebé iha interese ba arte no literatura atu komemora Loron Nasionál ba Kultura no nu’udár loron-moris Francisco Borja da Costa.

“Francisco Borja da Costa nu’udár pensadór prinsipál luta libertasaun nasionál nian, ne’ebé bele hatene liu-hosi nia obra sira hanesan poeta, jornalista no ativista. ohin, sei halo lansamentu ba livru “Francisco Borja da Costa: Poeta, Jornalista no Ativista” iha Centro Nacionál Chega, Antigu Komarka, Balide, Dili,” dehan Koordenadora Lalibur Borja, Milena da Silva, liuhosi Komunikadu Imprensa ne’ebé Agência TATOLI asesu, tersa ne’e.

Tanba, nia dehan, iha tinan-2014, liuhosi rezolusaun Konsellu Ministru aprova ona loron-moris Francisco Borja da Costa, 14 outubru 1946, nu’udár Loron Nasionál ba Kultura. Francisco Borja da Costa koñesidu nu’udár poeta boot Timor-Leste nian tanba ema hatene nia poezia sira ne’ebé nia hakerek no hosi hananu sira hanesan Inu Nasionál “Pátria! Pátria!”, “Foho Ramelau”, “Kolele Mai” no “Kdadalak Sulimutuk”.

“Borja la’ós poeta de’it maibé mós nu’udár jornalista no ativista revolusionáriu,” nia hateten.

Tuir nia, haree ba importánsia Borja da Costa nia kontribuisaun ba dezenvolvimentu kultura nasionál, Lalibur Borja da Costa halibur malu hodi komemora Loron Nasionál Kultura nian liuhosi atividade sira hanesan semináriu kona-ba Francisco Borja da Costa nia obra ba dezenvolvimentu kultura nasionál ho oradór sira hanesan Roque Rodrigues (Francisco Borja da Costa nia belun), Hérica Pinheiro (kandidatu PhD iha Universidade Coimbra) no Virgílio Guterres (Prezidente Konsellu Imprensa).

Tuir ajenda, lansamentu livru “Francisco Borja da Costa: Poeta, Jornalista no Ativista” ne’e sei hala’o iha 13 outubru iha Centro Nacional Chega, tuku 14:00 no kalan kulturál iha Arquivo e Múzeu da Resistência Timorense, iha 14 outubru 2020, tuku 17:00-22:00 ho aprezentasaun live painting, teatru, múzika no deklamasaun poézia Francisco Borja da Costa ninian.

Entretantu, Francisco Borja da Costa nia obra sira importante tebes ba dezenvolvimentu kultura nasionál. Borja da Costa no líder FRETILIN sira iha tempu ne’ebá utiliza kultura nu’udár komponente prinsipál ba unidade nasional no pensadór prinsipál ida iha luta libertasaun nasionál, dedika nia aan tomak nu’udár protagonista ida iha luta libertasaun nasionál.

Francisco Borja da Costa la’ós hakerek de’it poezia, produtu jornalístiku no planu dezenvolvimentu maibé mós sai fundadór ASDT/FRETILIN no líder ida hodi partisipa iha programa sosiál no polítika FRETILIN ninian.

Liu-hosi komemorasaun ne’e, bele hanoin hikas no hatutan obra Francisco Borja da Costa nian liuliu relasiona ho dezenvolvimentu kultura nasionál. Tempu ba timoroan hotu-hotu atu hatuur kultura nu’udár komponente prinsipál ba hametin unidade nasionál liuhosi programa dezenvolvimentu ne’ebé estruturadu no sistemátiku.

Liu-hosi komunikadu ne’e, Koordenadora Lalibur Borja, Milena da Silva, konvida maluk sira hotu atu bele partisipa iha semináriu, lansamentu livru no kalan kulturál hodi hanoin hikas Francisco Borja da Costa.

Jornalista: Cipriano Colo  

Editór: Câncio Ximenes

HAKEREK NO HATÁN

Please enter your comment!
Please enter your name here