Ekipa Operasaun Servisu Migrasaun detein Xineza ida. Imajen/Servisu Migrasaun

DILI, 13 outubru 2020 (TATOLI)- Ministériu Interiór liuhosi Diresaun Nasionál Servisu Migrasaun Timor-Leste, ohin, entrega hikas Xineza ida ho inisiál WY, tinan 45, ba Embaixada Xina iha Timor-Leste hodi haruka fila ba Xina, tanba problema la selu taxa ba Estadu Timor-Leste.

Xineza ne’e, ekipa Operasaun Servisu Migrasaun detein iha Otél ida iha área Hudi-Laran Dili, iha  sesta feira liubá,  tanba komete  krime fraude fiskál hodi dezvia hosi obrigasaun selu taxa ba Estadu Timor-Leste.

Komandante Setór Operasaun Servisu Migrasaun, Inspetór Polísia Luis do Carmo Pereira dehan, Servisu Operasaun Migrasaun detein sidadaun ne’e bazeia ba karta hosi Tribunál Distritál Dili.

“Servisu Migrasaun halo detensaun ne’e bazeia ba despaixu hosi Tribunál ne’ebé hatún ba iha Diretór Jerál Servisu Migrasaun, nune’e orienta hikas orden mai xefe setór operasaun hodi halo detensaun ba sidadaun ne’e, tanba nia komete krime fraude fiskál hodi viola artigu 314 kódigu penál, tanba kumpre obrigasaun hodi selu impostu komesa hosi maiu 2017 to’o juñu 2018 ho valór $ 4,275,00,” afirma Inspetór Polísia Luis liuhosi nota komunikadu imprensa ne’ebé Agência Tatoli asesu hosi Ministériu Interiór.

Antes ne’e, Tribunál Distritál Dili fó sai katak, sidadaun ne’e loke kompañia ho naran Tsawa D, Lda, la koopera hodi dezvia la selu impostu ba funsionáriu, impostu rendimentu no impostu retensaun final no mós uma ne’ebé nia aluga.

Atu evita kazu ne’e labele akontese tan, tuir planu ba oin, ekipa Operasaun Servisu Migrasaun sei halo operasaun konjunta ba kompañia sira ne’ebé fó servisu ba ema estranjeiru, maibé la tuir regulamentu hodi viola vistu ne’ebé iha.

Servisu Migrasaun rasik alerta ba Timor-oan hotu atu informa mai sede Servisu Migrasaun karik hetan irregularidade ruma ligadu ho kazu refere, inklui ema estranjeiru sira ne’ebé uza vistu turista hodi halo fali atividade profisionál.

Jornalista   : Eugénio Pereira

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here