Membru Konsellu Polisiamentu Komunitáriu (KPK) feminina na’in-46 hosi Munisípiu Dili tuir formasaun iha Komandu PNTL, Dili. Imajen Tatoli /Eugénio Pereira

DILI, 13 outubru 2020 (TATOLI)- Komandu Polísia Munisipiu Dili, ohin, fasilita formasaun ba Konsellu Polisiamentu Komunitáriu (KPK)  feminina na’in-46 kona-ba medida apoia polísia rezolve kazu violénsia doméstika iha komunidade nia leet.

Notísia Relevante : PNTL rejista kazu violénsia doméstika 449

Membru KPK feminina na’in-46 ne’e mai hosi Postu Administrativu neen hanesan, Atauru, Metinaro, Vera Krús, Don Aleixo, Kristu Rei no Na’in Feto.

Komandante Polisia Munisípiu Dili, Superintendente Xefe, Henrique da Costa dehan, formasaun ne’e importante tebes hodi hasa’e koñesimentu membru KPK feminina sira-nian atu partisipa ativa servisu ho sosiedade hodi minimiza númeru kazu violénsia doméstika.

“KPK feminina nia servisu pozitivu tebetebes. Formasaun ne’e fokus liubá oinsá f KPK feminina sira ajuda haree liu problema sira ne’ebé ita nia sosiedade sira enfrenta liu-liu buka rezolve problema kazu violénsia doméstika nu’udar krime públiku ne’ebé presiza rezolve,” hateten  Superintendente Xefe, Henrique  da Costa, ba jornalista iha Komandu PNTL, Caicoli, Dili.

Nia dehan, kada tinan PNTL Dili rejista númeru kazu violénsia doméstika ho númeru boot iha Dili. Tanba ne’e, prezensa KPK feminina koopera ho Ofisiál Polísia Suku (OPS) no autoridade suku buka sosializa informasaun ba sosiedade kona-ba lei violénsia doméstika no prevensaun ba krime violénsia doméstika.

“Dadus kriminál polísia nian hatudu katak, kazu violénsia doméstika iha Munisípiu Dili ninia númeru aas tebes, ida-ne’e sai atensaun ba treinamentu ida-ne’e hodi sira kria kooperasaun ho OPS buka rezolve problema hirak ne’e,” nia hateten.

Membru KPK sira informa mós kona-ba dezafiu sira ne’ebé siraenfrenta mak la iha farda no ekipamentu servisu hodi ajuda sira halo sosializasaun prevensaun krime violénsia doméstika ba sosiedade iha bairru-laran.

Kona-ba fardamentu ba membru KPK sira, Komandu PNTL Dili sei buka apoiu hosi doadores sira hodi ajuda KPK feminina sira-nia servisu.

Komandu PNTL Dili servisu hamutuk ho Autoridade Munisípiu Dili, kinta (15/10), sei organiza semináriu nasionál ida envolve KPK feminina sira hamutuk ho Organizasaun Naun Governmental (ONG), sira ne’ebé luta ba direitu feto no labarik hodi fó formasaun ba feto KPK iha Sentru Formasaun Polísia, Comoro, Dili.

“Semináriu ne’e sei diskute isu no problema sosiál ne’ebé KPK feminina sira identifika mosu beibeik iha suku no aldeia sira hodi halo planu ida para bele aprezenta iha semináriu hodi buka solusaun hamutuk,” nia informa.

Xefe Suku Kampung Alor, Alcina C.D. Santos. Imajen Tatoli/Eugénio Pereira

Iha fatin hanesan, Xefe Suku Kampung Alor, Alcina C.D. Santos dehan, formasaun ne’e importante tebes, tanba prezensa KPK feminina nian koopera di’ak ho OPS hodi hakotu problema violénsia doméstika ne’ebé akontese iha sosiedade nia leet.

Nia dehan, violénsia doméstika nu’udar krime públiku, bainhira feto ida hetan tratamentu la di’ak hosi nia kaben, presiza hato’o ba KPK feminina atu buka ajuda rezolve problema tuir dalan familiar hodi evita problema labele ba to’o iha Tribunál no evita mós problema divórsiu.

Autoridade suku ne’e hatutan, KPK feminina sira nia maneira rezolve problema violénsia doméstika entre família dala ruma di’ak liu fali polísia mane sira, tanba bainhira problema ruma akontese polísia ba uza de’it forsa, maibé KPK feminina sira uza maneira komunikasaun di’ak hodi hakotu problema.

“Prezensa KPK feminina iha Dili, ha’u haree kapás tebe-tebes, tanba durante ne’e feto mós apoiu servisu iha suku barak. Ita haree KPK nia servisu ne’e iha 2014 buat hotu la’o di’ak ona, maibé too ikus problema sempre mosu fila fali, mezmu krime polítika mós akompaña hela ita, maibé ami KPK feminina halo esforsu maka’as nafatin rezolve problema ne’ebé sempre mosu iha suku laran,” nia hateten.

Autoridade Suku Kampung Alor ne’e husu ba Governu Timor-Leste no Komandu Jerál PNTL atu tau konsiderasaun aas apoia servisu KPK feminina iha territóriu Timor-Leste, tanba KPK feminina labele servisu to’o kalan boot.

“Talvés problema ruma mosu tenke bolu ami feto maka ba rezolve, tanba atu bolu mane sira ne’e ba la’ós ko’alia ho kalma, maibé sira mai ho nervozu entaun problema labele menus,” nia hateten.

Tuir nia haree, prezensa KPK sai nu’udar solusaun úniku konsola povu atu moris hakmatek iha aldeia hodi kontribui ba estabilidade seguransa no moris hakmatek ba povu Timor-Leste.

Daudaun ne’e membru KPK iha Suku Kampung Alor hamutuk  na’in-50 kompostu hosi mane na’in-25 no feto na’in- 25 simu ona pose hosi Komandu PNTL Dili.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here