DILI, 13 outubru 2020 (TATOLI) – Tuir oráriu ne’ebé públika ona hosi komisaun jogu kopa Federasaun Futeból Timor – Leste (FFTL) katak iha jogu oitavu finál ne’ebé sei hala’o iha Estádiu Café Gleno, semana ne’e, ekipa Lalenok United FC sei hasoru nia adversáriu AS Marca FC.
Notísia Relevante : Lalenok United FC hakat ona ba oitavo finál
Treinadór Lalenok, Simón Elissetche hatete, Lalenok tenke manán nia adversáriu nune’e bele kontinua hakat ba kuartu finál iha semana oin mai.
“Bainhira ami joga hasoru DIT remata ami kontinua hala’o treinamentu nafatin, ami nia alvu mak tenke hatudu jogu ne’ebé di’ak atu manán para avansa ba jogu tuir mai,” dehan Simón ba Agência Tatoli via mensajen liuhosi media sosiál Facebook, ohin.
Nia dehan, Lalenok sei hatudu jogu ne’ebé bonitu hodi halo kontente adeptu hotu nune’e bele mós halo rame Estádiu Café Gleno.
Maski Lalenok ekipa jigante no Marca hanesan ekipa promovidu hosi terseira divizaun, maibé treinadór ne’e respeita hodi la hateke ho matan sorin tanba bola kabuar no minutu 90 mak sei determina sira-nia destinu.
Jornalista : Hortencio Sanchez
Editór : Francisco Simões
