IPG-SEP fahe informasaun kona-ba risku dezastre naturál, iha XGRR, Largo Lecidere, tersa (13/10). Imajen Tatoli/Egas Cristovão

DILI, 13 outubru 2020 (TATOLI)–Atu halo fahe informasaun ba públiku kona-ba redusaun risku dezastre naturál iha Timor-Leste,  maka ekipa jestaun Xanana Gusmão Reading Room (XGRR) no Youth Community Care (YCC) organiza semináriu hodi fahe informasaun ba estudante sira.

Iha sensibilizasaun ne’e, ekipa jestaun hili jestór hosi Institutu Petróleu no Jeolojia (IPG, sigla inglés) no Sekretaria Estadu Protesaun Sivíl (SEPS) maka sai hanesan oradór prinsipál.

Atividade ne’e realiza iha ámbitu selebarasaun loron mundiál ba risku dezastre naturál ne’ebé maka monu iha loron 13 outubru.

Diretór Risku Jeolójiku IPG, Eugênio Soares, iha entrevista hateten, oportunidade ne’e hanesan parte atu institutu disemina informasaun ba joven sira nu’udár futuru nasaun, liuliu kona-ba papél IPG relasiona ho dezastre naturál.

“Ami fahe informasaun ba alin sira iha ne’e, indireitamente bele kontribui ba dezenvolvimentu nasaun ninian,” Diretór ne’e hateten iha XGRR, Largo Lecidere, tersa ne’e.

Hanesan jestór iha IPG, Eugênio iha esperansa katak liuhosi diseminasaun informasaun ne’e estudante sira bele habelar liután informasaun to’o ema hotu hodi bele ajuda hamenus dezastre naturá ne’e rasik. 

Dirijente ne’e esplika kona-ba papél IPG iha prevensaun risku no dezastre hanesan rai halai, inundasaun, rai-nakdoko, tsunami no mós erosaun kostaria.

Durante ne’e, IPG hala’o ninia papél hodi halo peskiza, hafoin entrega relatóriu peskiza ne’e ba institutu relavante sira.

Iha fatin hanesan, Diretór Jerál Protesaun Sivíl Superintedente Polísia Ismael Babo, reprezenta Sekretaria Estadu Protesaun Sivíl agradese no orgullu ba XGRR, tanba bele konvida fahe informasaun.

“Temátika ne’ebé ha’u mai ko’alia kona-ba jestaun Governu hodi responde ba dezastre, polítika Governu ninian, tanba la’ós responsável ajente protesaun sivil de’it maibé setór privadu no ema hotu. Tanba ema hotu iha responsabilidade ba dezastre ne’ebé akontese,” Ismael subliña. 

Tuir nia, iha komponente tolu atu apoia prevensaun dezastre naturál bazeia ba giaun maka prevensaun, apoiu emerjénsia, no rekoperasaun ba fali vida normál. 

“Pontu importante atubele kuda iha ema hotu nia hanoin maka proibidu atu tesi ai arbiru nu’udár kontribuisaun ba protesaun natureza,” nia hameno.

Semináriu ne’e partisipa hosi estudante sekundáriu no universitáriu inklui joven sira. 

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here