Vise-Ministra Finansa, Sara Lobo Brites, halo intervensaun iha abertura jogu desportivu komemora loron mundiál estatístika, iha resintu DGE, Caicoli, tersa (12/10). Imajen/Mídia VMF

DILI, 13 outubru 2020 (TATOLI)–Vise Ministra Finansa, Sara Lobo Brites konsidera Diresaun Jerál Estatístika (DGE, sigla portugés) durante ne’e dezempeña pápel importante hodi kontribui prodús dadus hodi ajuda Governu kria polítika ba orsamentu.

“Hanesan Vise-Ministra Finansa desde 2018, to’o agora Ministériu Finansa sente orgullu ho prezensa Diresaun Jerál Estatístika iha estrutura ministériu, ne’ebé hatudu dezempeñu prodús relatóriu importante hodi Governu bele trasa polítika Orsamentu Jerál Estadu,” relata Vise-Ministra Finansa iha ámbitu abertura jogu desportivu ba komemorasaun loron mundiál estatístika, iha resintu DGE, Caicoli, tersa ne’e.

Governante ne’e nota katak iha relatóriu lubuk ida maka DGE prodús ona hanesan iha tinan kotuk konsege realiza sensu agríkola 2019 no iha ámbitu komemorasaun loron mundiál estatístika sei lansa tan konta nasionál 2019, dadus komérsiu no Índise Presu Konsumidór (IPK) setembru nian.

“Iha 2021 pleneia atu realiza tan sensu uma-kain, tanba ne’e nu’udár ekipa importante tebes iha Ministériu Finansa no importante ba ita-nia rai, liuliu kontribui ba dezenvolvimentu país,” nia akresenta.

Nia konsidera inistiava realizasaun jogu desportivu ne’e di’ak tebes tanba la’ós de’it atu komemora loron mundiál estatístika maibé liuhosi jogu ne’e atubele hametin espíritu ekipa no kria ambiente di’ak.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here