DILI, 13 outubru 2020 (TATOLI)- Ministru Defeza, Filomeno da Paixão de Jesus, hato’o agradese ba Governu Malázia ne’ebé fó apoiu maka’as ba dezenvolvimentu setór defeza Timor-Leste nian.
Notísia Relevante : Malázia Sei Kontinua Apoiu TL iha Área Capacity Building
Ministru Filomeno hato’o agradesimentu ne’e durante hala’o enkontru kortezia ho i Embaixadóra Malázia mai Timor-Leste, Sarima Akbar, ohin, iha Ministériu Defeza, Fatuhada, Dili.
Nota komunikadu imprensa ne’ebé Agência Tatoli, asesu hosi Gabinete Ministeriu Defeza, relata katak, iha ámbitu sorumutuk ne’e, Ministru Filomeno Paixão hato’o agradese Malázia ba apoiu no asisténsia hotu iha setór defeza.
Governante ne’e mós propoin ba Embaixadóra atu país rua explora liután área kooperasaun foun iha defeza nian no propoin mós atu parte rua bele ofisializa liután parseria no kooperasaun defeza entre Timor-Leste no Malázia liuhosi diskusaun no selebrasaun memorandu entendimentu (MoU) entre governu rua.
Embaixadóra Malázia mai Timor-Leste, Sarima Akbar mós hato’o agradesimentu kle’an ba Timor-Leste ne’ebé sempre fó apoiu ba Malázia iha diplomasia nivel internasionál no ba partisipasaun ativu Timor-Leste iha Forum Rejionál ASEAN.
Embaixadóra toma nota proposta Timor-Leste nian hodi diskute no estabelese MoU iha domíniu defeza entre Malázia no Timor-Leste.
Tuir mai parte rua Timor-Leste no Malázia sei diskute liután iha nivel tékniku kona-bá área kooperasaun no parseria defeza no sei diskute mós kona-bá MoU entre país rua.
Jornalista : Eugénio Pereira
Editór : Francisco Simões
