Ministru Defeza, Filomeno da Paixão de Jesus. Imajen/António Gonçalves

DILI, 13 outubru 2020 (TATOLI)—Ministru Defeza (MD), Filomeno Filomeno Paixão de Jesus, hateten tuir planu iha tinan 2021 ne’e Ministériu Defeza sei halo estabelesimentu ba autoridade marítima no konseitu estratéjiku militár ne’ebé hatuur ona iha planu prioridade.

“Ministériu Defeza sei tau atensaun ba estabelesimentu Autoridade Marítima no Konseitu Estratéjiku Militar ne’ebé sei haree ba dezenvolvimentu sistema-de-forsas ho dispozitivu-de-forsas ba iha F-FDTL,” dehan Ministru Defeza, Filomeno Filomeno Paixão de Jesus, inform aba jornalista sira hafoin hala’o sorumutu no hato’o ba Prezidente Repúblika (PR), Francisco Guterres Lú Olo, kona-ba asuntu ne’e iha Palásiu Prezidensiál Nicolau Lobato, Bairru-Pité, Díli, tersa ne’e.

Filomeno Paixão hatutan, Autoridade Marítima sei koordena hosi Xefe Estadu Maiór Jenerál F-FDTL, Majór-Jenerál Lere Anan Timur, no kompostu hosi liña ministeriál sira ne’ebé iha ligasaun servisu ho área marítima. Nia dehan, ho estabelesimentu autoridade ne’e, Estadu bele halo poupansa iha “formasaun kapasidade”.

“Lalika halo mariña bara-barak, basta F-FDTL iha ró-ahi to’o Kosta-Sul to’o Zona Ekonomia Eskluziva ne’eba, hotu-hotu ne’ebé iha intervensaun iha tasi-laran bele sa’e ró ne’e hodi halo sira-nia atuasaun,” Ministru Filomeno Paixão hateten.

Atu fasilita servisu Autoridade Maritima nian, tuir Ministru Defeza, tinan oin sei harii sede Komponente Navál ho parte balun hosi sede ne’e, sei uza mós hanesan sede hosi Autoridade Marítima iha Hera, Díli.

Iha Komemorasaun Aniversáriu Komponente Naval F-FDTL ba dala-18, iha janeiru tinan ne’e, Prezidente Repúblika afirma Timor-Leste nu’udár nasaun mesak labele fó seguransa ba nia tasi tanba ne’e presiza promove seguransa koletiva ka seguransa rejionál hamutuk no salienta kona-ba importánsia harii Sistema Nasionál Autoridade Marítima.

Timor-Leste iha kooperasun trilaterál ho Indonézia no Japaun atu asegura tasi. Iha parte seluk, Governu Austrália oferese ona ró militár rua ne’ebé sei entrega iha tinan 2023 no hatudu tiha ona nia vontade atu koopera ho Timor-Leste hodi tau matan ba seguransa marítima.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here