Logotipu TDD. Imajen Tatoli/Egas Cristóvão

DILI, 12 outubru 2020 (TATOLI)-Tribunal Distritál Dili (TDD), ohin, hala’o julgamentu ba arguidu na’in-rua ho inisiál MMA no AGA tanba  deskonfia uza dokumentu lezadu YAV  laiha koñesimentu hodi uza ba arguidu sira-nia kompañia manan projetu Estadu nian  dada eletrisidade iha 2012 no 2013.

Tuir faktu ne’ebé arrola hosi Ministériu Públiku (MP) katak, iha tinan-2012 no 2013, iha Aldeia Anin Fuik, Beto Oeste, Suku Comoro, Postu Administrativu Don Aleixo, Munisípiu Dili, arguidu MMA ba lezadu YAV husu halo dezeñu ho BoQ ba nia kompañia UNAPLO, Unipesol, Lda.

Iha tempu hanesan arguidu AGA, busu mós lezadu atu halo nia dezeñu no BoQ. Arguidu MMA  nia projetu iha Suku Lubasa, no arguidu AGA nian, hosi suku Olobai, to’o Nacboruk, Viqueque.

Lezadu YAV, fó nia dokumentu hanesan diploma, sertifikadu, curriculum vitae , no eleitorál ba arguidu MMA atu tuir ka partisipa iha konkursu tenderizasaun projetu instalasaun liña eletrisidade iha EDTL.

Lezadu, nunka fó nia dokumentu hanesan diploma, sertifikadu, cv, no eleitorál, ba arguidu AGA. Maibé, ikus mai arguidu MMA foti fali lezadu nia dokumentu entrega tutan fali ba arguidu AGA  hodi nune’e hetan iha nia profile kompañia nian, hodi hetan projetu seem fó koñesimentu ba lezadu.

Bainhira  lezadu verifika dokumentu kompañia sira hosi Viqueque  hodi atu halo pagamentu  hetan katak nia dokumentu tama fali iha kompañia Liqui Dolly  ne’ebé pertense arguidu AGA nian.

Ho ne’e lezadu telefone kedas ba arguidu AGA hodi oinsá maka dokumentu iha nia profile Ajénsia Dezenvolvimentu Nasional (ADN) maibé arguidu la responde ba lezadu nia pergunta hodi nonook de’it.

Arguidu sira halo sira nia hahalok ne’e livre  ho intensaun no hanoin rasik, arguidu sira hatene momoos katak foti ema nia dokumentu uza ema sem hetan autorizasaun hosi nia nain hodi benefísiu ba  nia aan ne’e laloos no labele, maibé sira halo nafatin.

Arguidu sira mós hatene katak hahalok ne’e sei hetan kastigu tuir lei. Ho hahalok sira-ne’e konstitui arguidu sira nu’udar ko-autór material ho forma konsumada ba krime burla agravadu  iha art. 267° hotu-hotu husi Kódigu Penal.

Hatán ba akuzasaun sira-ne’e, arguidu nain-rua, konfesa ba Tribunál  katak faktu sira-ne’e balun loos no balun laloos.

Arguidu MMA, friza katak, iha  2013 nia parte halo duni kontratu verbal ida ho lezadu  atu halo dezeñu BoQ, tanba momentu ne’e hetan projetu adjudikasaun la’ós liuhosi prosesu tenderizasaun.

Arguidu konfesa, momentu ne’ebá regra balu, tan ne’e mak halo kontratu ho lezadu atu fó dezeñu ida di’ak, nune’e lezadu konkorda fó dokumentu no halo dezeñu dala ida, no tuir kontratu arguidu kontratu mós sei selu  ho $3,500,00 ba lezadu  kuandu Estadu halo pagamentu.

Arguidu AGA  hateten, momentu la halo kontratu ho lezadu atu selu, maibé dehan de’it atu fó osan sigarru, kuandu Estadu halo pagamentu ba sira, no momentu ne’ebá, arguidu konsege fó osan $500,00 ba lezadu hanesan osan sigarru.

Lezadu YAV, hateten, loos duni nia parte maka halo dezeñu tuir kontratu katak kada ema ida tenke selu $3,500,00 maibé arguidu bosok fó de’it $500,00.

Hafoin rona tiha parte sira,  tama kedas ba alegasaun  Ministériu Públiku husu ba Tribunál atu husu absolve arguidu MMA, no husu atu kondena arguidu AGA tuir lei, tanba bosok lezadu konforme nia hakarak.

Parte defeza husu  Tribunál atu fó justisa justu tuir konviksaun rasik. Maibé, Tribunál adia fila-fali  julgamentu ne’e ba iha loron 23  outubru, tinan ne’e, iha tuku 14:00  Otl, hodi rona  desizaun finál.

Julgamentu ne’e prezide hosi juis koletivu Argentinho Nunes, João Ribeiro, Julmira Auxiladora no Ministériu Públiku reprezenta hosi prokuradór na’in-ida no arguidu hetan asisténsia hosi Defensora Públiku.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here