Kontra-atake entre jogadór Boavista no Kablaki FC. Imajen Tatoli/Dok

DILI, 12 outubru 2020 (TATOLI) – Lakon ho Emanuel FC 0-3 ne’ebé fó derrota boot ba Kabaki FC, iha jogu Kopa  Federasaun Futeból Timor – Leste  (FFTL), domingu lokraik (11/10), iha Estádiu Munisipál Dili,  halo Treinadór Kablaki FC, João Fernandes, “hirus boot” no la aguenta hodi deskobre sai ba públiku kona-ba ninia jogadór sira nia “kustuma ka lisan aat” sira.

Notísia Relevante : Kopa FFTL, Manan Kablaki maibé Emanuel “hela” nafatin

João Fernandes hateten, joga lakon ka manan iha kampu laran ne’e normal. Maibé, ba nia jogadór sira la fokus ne’e mak sai problema no lori  derrota ba Kablaki FC iha kopa FFTL epoka ne’e.

“Ha’u presiza fó sai ba públiku, jogadór barak mak halimar PUBG, entaun toba tuku 3 madrugada depois ba joga tan iha futsal, oinsá mak sira iha beran (estamina) atu joga fali iha kampu boot. Hanoin ida hanesan ne’e jogadór laiha responsabilidade ba klube tenke troka afirma João Fernandes hodi responde Agência Tatoli iha Estádiu Munisipál Dili, domingu (11/10).

Treinadór Kablaki FC João Fernandes, hateten, iha tasa 12 de Novembru, Kablaki FC presiza tan jogadór foun balu hodi reforsa tanba tuir nia jogadór sira agora ne’e ladún sufisiente.

Nia dehan, tenke buka tan jogadór seluk ne’ebé iha responsabilidade hodi joga hamutuk ho klube  iha Tasa 12 Novembru, nune’e bele fó vantajen di’ak ba klube no adeptu sira.

“Kona-ba tasa 12 Novembru nian, ha’u hanoin atu buka tan jogadór foun balun bele mai kompleta tan, tanba ita haree jogadór sira agora ne’e nia dezempeñu ladún di’ak,” hateten João Fernandes.

Notísia Relevante : Kablaki rekoñese nia frakeza

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here