Sekretáriu Estadu Kooperativa, Elizário Ferreira. Imajen Tatoli/Jogerjo Guterres

DILI, 12 outubru 2020 (TATOLI)–Sekretaria Estadu Kooperativa (SEKoop) kapasita grupu kooperativa no joven na’in-60 hodi bele kontribui ba dezenvolvimentu nasionál iha área kooperativa.

“Objetivu prinsipál formasaun ne’e hakarak organiza no forma sira atubele sai formadór no organizadór ne’ebé di’ak, atu nune’e sira rasik maka tun ba baze atu eduka povu bele prodús no kontribui ba dezenvolvimentu ekonomia iha nível lokál baze iha  área kooperativa, tanba ne’e maka ita fó formasaun ba juventude sira hamutuk na’in-60,” dehan Sekretáriu Estadu Kooperativa, Elizário Ferreira, iha salaun Federasaun Hanai Malu, Bairro Pité, segunda ne’e.

Aleinde ne’e, organiza foin sa’e sira atu sai motividór no forma juventude atu hatene uza osan no buka osan inklui projeta ba rendimentu.

“Ita bele fasilita formasaun ne’e ho kualidade profisionál atu nune’e sira mós bele halo serbisu di’ak iha nível báziku,” nia akresenta.

Formasaun ne’e hodi projeta sai formadór ne’ebé organiza populasaun atu komunidade bele kria kooperativa no hamosu ideia kreativu hodi kontibui ba hasa’e produsaun iha rai laran.

Partisipante sira ne’ebé tuir formasaun ne’e balun hosi Dili maibé barak liu hosi munisípiu tanba hanoin katak atu serbisu iha munisípiu no tuir planu formasaun ne’e hala’o durante loron sanulu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here