Ofsial Polísia Nasional Timor-Leste (PNTL) bainhira fó seguransa ba asaun sira iha Dili laran. Imajen Tatoli/Dok

DILI, 12 outubru 2020 (TATOLI)- Komandu Polísia Nasional Timor-Leste (PNTL) Munisípiu Dili kontinua halo esforsu hodi “kombate” konflitu sira ne’ebé akontese iha bairru sira iha Dili laran.

Notísia Relevante : PNTL Dili fó treinamentu ba KPK Manleuana na’in-60

Esforsu ne’ebé PNTL halo mak reforsa Ofisial Polísia Suku (OPS) atu halo vizita ba kada uma sira iha Dili laran hodi sensibiliza programa paz, haforsa kbiit membru Konsellu Polisiamentu Komunitária  no halo enkontru pro-ativu entre Komandante Polísia Dili, Superintendente Xefe Henrique da Costa,  ho komandante polísia eskuadra sira iha area jurisdisaun Dili  hodi buka solusaun ba “kombate” konflitu sira iha kapitál nasaun ne’e nian.

“Reuniaun ohin ne’e ami fó briefing ba komandante eskuadra sira hodi relata progresu servisu ne’ebé sira halo no diskute mós asidente no insidente ne’ebé akontese iha sira nia fatin li-liu iha área Postu Administrativu Don Aleixo maka sempre akontese beibeik kazu dez-orden públiku hanesan Golgota, Ailok-Laran, Lorumata, Bebonuk. Ami trasa estratéjia para halo prevensaun liuhosi tipu reativa servisu operasaun no envolve membru KPK no OPS atu solusiona tipu krime sira ne’e,” hateten Segundu Komandante Polísia Dili, Superintendente  Euclides Belo, ohin, ba jornalista iha Komandu PNTL, Caicoli, Dili.

Euclides hatutan, durante enkontru, Superintendente Xefe, Henrique da Costa fó orientasaun ba seksaun tránzitu Dili halo servisu maka’as kontrola movimentu transporte públiku iha kapitál Dili iha tempu dadeer, loron-manas no lokraik hodi evita asidente tráfegu no engarrafamentu.

Fó seguransa ba setór privadu Xineza

Iha parte seluk, PNTL Dili mós simu ona karta hosi Governu Timor-Leste atu fó seguransa másimu ba setór privadu Xineza lubuk ida ne’ebé sei halo vizita hosi Xina to’o mai Timor-Leste ho aviaun iha Aeroportu Prezidente Nicolau Lobato, Comoro Dili, tersa aban (13/10).

“Ami diskute mós preparasaun atu fó seguransa ba sidadaun Xineza sira ne’ebé aban sei to’o mai Timor-Leste ho aviaun iha Aeroportu hodi fó seguransa sira hodi ba hela iha kuarentena durante loron-14,”  hateten Euclides Belo.

Emprezáriu Xineza sira ne’ebé aban vizita mai Timor-Leste maioria servisu ba konstrusaun ninian, inklui sira ne’ebé loka loja iha sidade Dili no munisípiu sira.

Otél sira ne’ebé Governu Timor-Leste deside ba negosiante Xineza sira atu halo konfinamentu obrigatóriu mak Golgota, Otél Aeroportu, Pio Nei, New Fortuna, no Otél Conti.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here