Segundu Komandante Polísia Munisípiu Dili, Superintendente, Euclides Belo. Imajen Tatoli/Eugénio Pereira

DILI, 12 outubru 2020 (TATOLI)- Komandu Polísia Munisípiu Dili detein ona suspeitu motorista mane ida ne’ebé lori karreta Mitsubishi Fuso xapa matrikula 55466 ne’ebé sama mate vitima Bendito Sarmento ho nia motór Honda Vario iha área Colmera, Dili, sábadu (10/10).

Adjuntu Komandante Polísia Munisipiu Dili, Superintendente Euclides Belo,  ohin, deklara, asidente tráfegu ne’ebé rezulta vítima mate fatin, tanba karreta nia roda maka sama vítima nia ulun, bainhira ho motór Honda Vario xapa matríkula I.3035 atu ultrapasa karreta.

Matebian ho nia motór liuhosi diresaun Tribunál atu ba Colmera hafoin to’o iha Rotunda Colmera (restaurante Wasabi nia oin) matebian tenta ultrapasa karreta fusu boot ne’ebé tula sasán konstrusaun hosi kompañia balun nian maka hasoru kedas dezastre ne’e.

Vítima Bendito Sarmento, moris loron 4 Abril  1998 hosi Rejiaun Administrativu Espesiál Oe-Cusse Ambenu (RAEOA) ne’ebé hela iha Suku Bidau, Lesidere.

Euclides dehan, hafoin akontesimentu suspeitu motorista halai sai hosi karreta ba entrega aan kedas ba Polísia Eskuadra Caicoli.

“Suspeitu nia naran, ha’u seidauk bele fó sai, tanba agora iha PNTL nia liman hodi hein prosesu investigasaun kle’an, tanba asidente ne’e rezulta vítima mate fatin,” dehan Euclides ba jornalista liuhosi konferénsia imprensa iha Komandu PNTL, Caicoli, Dili.

Nia dehan, rezulta investigasaun polísia tránzitu haree asidente ne’e akontese kauza hosi fatór umanu entre vítima no suspeitu.

Daudaun ne’e mate isin, PNTL no parte Ospitál Nasionál Guido Valadares (HNGV) entrega ona ba família hodi hein prosesu funerál.

Komandu PNTL rasik rejista durante setembru 2020, mosu asidente tráfegu iha Timor-Leste rezulta  vítima na’in-10 mate no ema nain-38 sofre kanek todan.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here