Ministru Administrasaun Estatál, Miguel Pereira de Carvalho. Imajen Tatoli/Egas Cristovão

DILI, 12 outubru 2020 (TATOLI)–Ministru Administrasaun Estatál (MAE), Miguel Pereira de Carvalho, rejeita informasaun ne’ebé dehan rekrutamentu administradór munisipál mai hosi partidu.

Governante ne’e dehan, prosesu rekrutamentu antes ne’e halo konsultasaun ho grupu traballu tékniku ministeriál hotu ne’ebé sei destaka ba munisípiu hafoin juri relata ba MAE.

“Prezidente autoridade ka administradór munisípiu la’ós mai hosi partidu, sira hanesan reprezentante Governu sentrál iha nível munisípiu no bainhira loke konkursu maka ema hotu konkorre, tantu funsionáriu públiku ka ema hosi li’ur,” tenik Ministru iha Palásiu Governu, segunda ne’e.

Atu konkorre partisipa iha prosesu ne’e sei liuhosi rektutamentu pur méritu no Ministru sei delibera kandidatu selesionadu sira hafoin halo nomeasaun.

“Konsellu Ministru halo ona dezisaun liuhosi rezolusaun Governu ida atu nomea sira ne’ebé iha lista laran. Ida ne’e atubele sai prezidente autoridade ka administradór munisípiu no iha tempu hanesan mós ezonera sira ne’ebé daudaun eziste maibé agora kontinua serbisu to’o iha ema foun,” nia akresenta.

Enkuantu, kritériu teste ba administradór munisipál tuir dekretu-lei númeru 3/2016 artigu 20 hateten katak kandidatu bele mai hosi funsionáriu públiku ka hosi li’ur.

“Se nia hanesan funsionáriu públiku ida,  nia grau hanesan tékniku superiór maibé se la’ós entaun hala’o funsaun hanesan dirijente administrasaun públika,” nia realsa.

Kritériu seluk maka tenke iha esperiénsia profisionál iha administrasaun públika, mínimu tinan-lima.

“Se la’ós funsionáriu públiku, nia tenke iha ho idade mínimu 45 no iha esperiénsia profionál tinan-lima iha área jestaun administrasaun ka iha setór privadu, ho kondisaun saúde di’ak, iha koñesimentu ba sasán informátika,” membru ezekutivu ne’e esplika.

MAE daudaun fó sai ona rezultadu teste ba iha vaga administradór munisipál Baucau, Viqueque no Lospalos, maibé teste seidauk tama faze finál.

“Rezultadu foin provizóriu hosi ezame eskrita maka foin sai no agora juri sira kontinua simu reklamasaun no sei trata reklamasaun sira, ida-ne’e maka faze dahuluk,” nia informa.

Jonalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here