Ilustrasaun Violénsia Doméstika. Imajen/foti husi Google

DILI, 12 outubru 2020 (TATOLI)-Tribunál Distritál Dili (TDD) liuhosi desizaun aplika pena prizaun fulan-sia  no suspende ba tinan-ida, fulan-rua  ba arguidu Francisco Elísio de Sousa Gama tanba faktu provadu komete krime violasaun doméstika (VD).

Tuir produsaun prova Tribunál nian iha julgamentu sira liubá iha deklarasaun arguidu, lezada no auto ne’ebé konsta faktu sira provadu katak  iha loron 05 fulan novembru 2019, arguidu ho lezada Anita Soares  nu’udar  feen-laen  iha sira-nia rezidénsia Mandarin, Aldeia Boa Morena, Motael, Dili, bainhira arguidu  sai hosi uma telefone ba lezada la simu, nune’e arguidu  fila uma baku lezada.

Konsekuénsia hosi  hahalok arguidu nian ne’e, lezada sente moras iha nia kotuk laran, kakorok no halo kedas  tratamentu intensivu iha ospitál.

Arguidu halo ho forma livre, ho de propózitu halo agresaun fízika  hasoru lezada, katak agresaun mak arguidu halo  hasoru lezada, konsidera hanesan meiu ida hodi  halo moras no bubu  iha lezada  nia isin.

Hahalok arguidu nian ho konsiénsia  no hatene katak, hahalok  ne’e lei bandu, maibé arguidu halo nafatin.

Ho hahalok  ne’e, konsidera  arguidu  hanesan autór material ho forma konsumada, prátika krime  violénsia doméstika tuir arguidu  3,35 alínea b) hosi lei númeru 7/2010,ho forma ofensa integridade fízika simples, tuir artigu 145, hosi kódigu penál Timor-Leste.

Juis Ivan Suritai, hateten, tuir entendimentu Tribunál nian hodi kondena arguidu ho pena prizaun fulan-sia  no suspende ba tinan-ida (1) fulan-rua (2). Maibé, Tribunál seidauk halo fiksasaun aplikasaun pena ba arguidu, tanba antes ne’e arguidu mós iha rejistu kriminál komete kazu ida iha kondenasaun Tribunál nian  ho pena suspensaun hanesan. Tanba ne’e, Tribunál sei tetu fila-fali pena  únika ka suspensaun ne’ebé adekuadu hafoin sei notifika fila-fali arguidu hodi bele kumpre.

Audiénsia julgamentu ne’e parte prokuradór auzente no arguidu hetan asisténsia legal hodi Defensor Públiku Henrique Maris.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here