Ekipa Banda Muzika SANTER. Imajen/Memensio Sequeira Freitas.

OSSÚ, 12 outubru 2020 (TATOLI)—Múzika mak lian ne’ebé kompiladu hosi kontém ritmu, múzika ne’e rasik, toon no armonizasaun. Ekipamentu ne’ebé suporta hodi forma múzika ida, sei rezulta ritmu ida-ne’ebé dada ka hamosu interese atu ema bele rona. Tanba, bainhira ita rona múzika, sei fó serenidade rasik ba kualker ema ida. Múzika, bele aumenta mós ema ida ninia “mood” ka ema-nia “humor”. Ne’e katak, kada ema ida iha ninia gostu rasik atu rona múzika ne’ebé tuir ninia hakarak ka ninia mood rasik.

Notisia Relevante: Ovid-16 doko Ossú, nakar ne’e tenke ho talentu

Ba ema barak, múzika mak elementu sentrál hosi moris ne’e rasik. Ema sei sente fresku, ema sei sente motivadu liután, ema-nia espíritu atu halo buat ruma sei aas liután bainhira ema-ne’e rona múzika. Múzika, sai tebes fonte ba inspirasaun ba ema hirak ne’ebé apaixonadu ba múzika.

La interese ema-ne’e sé, la interese ema-nia kondisaun oinsá, ema-nia sentimentu no emosaun universal. Múzika sempre sai maneira ida di’ak atu halo ema konsiente ba relasaun ne’e. Ida-ne’e bele halo ema loke uituan ema-nia aan no espresa sentimentu ne’ebé antes ne’e ema ne’e la sente.

Ema ida-idak moris ho talentu rasik. Talentu ne’ebé sai hanesan dón ida hosi Maromak bainhira nia moris mai. Kabe ba ema ida-idak atu oinsá bele dezenvolve talentu ne’ebé ema-ne’e iha ona, atu partikularmente ka liuhosi grupu ruma.

Ekipa banda Muzika SANTER. Imajen/Memensio Sequeira Freitas.

Motivasaun ida-ne’e duni mak lori joven na’in-neen (6) hosi Parókia Ossú halibur malu iha grupu Banda Múzika liu hosi toka no kanta loro-loron. Sira halibur malu iha espíritu ida de’it. Hakarak ida-de’it mak atu bele dezenvolve sira-nia talentu iha múzika hodi bele anima ninia maluk sira seluk iha fatin ne’ebé sira horik ba. Sira hotu iha entuziasmu atu bele harii grupu banda ida mezmu simples no sei mukit ba fasilidade sira.

Sira-ne’e la seluk, sira mak joven Ossú-oan ne’ebé sempre ajuda parókia hodi realiza programa animasaun oin-oin liu hosi talentu ne’ebé sira iha ona. Sira sempre hola parte hamutuk ho ekipa animadora Parókia Ossú nian bainhira iha programa sira ne’ebé relasiona ho animasaun. Sira la karak ba talentu ne’ebé sira iha. Haree ba espíritu ne’ebé sira iha, liuhosi programa Kermese ka “pameran” ne’ebé parókia Ossú organiza iha tinan 2018 iha ámbitu komemorasaun aniversáriu Parókia Ossú nian ba dala-81, grupu joven ne’ebé kle’ur ona la’o no toka hamutuk ne’e harii duni banda múzika ida ho naran “Banda SANTER”.

Helder Amaral, nu’udar grupu ne’e nia akompañadór haklaken “Banda Santer” hanesan grupu múzika aquistik ida-ne’ebé harii iha Parókia Ossú, Dioseze Baucau Timor-Leste, parte leste iha Tinan 2018. Naran “Banda SANTER” rasik nu’udar sigla husi SANTA TERESINHA ne’ebé mak hanesan mós Padrueira ba sarani Parókia Ossú.

Ekipa sira hosi Banda SANTER nian mak hanesan Lucio Maria Pascoal aliás Adino (kahong), Amadeu Cruz (gitaris), Lucio Fernando alias Borakai (baixu), Napoleão alias Obai (keyboard) no Ovania no Brandolinda (vocalis). Grupu ne’e iha ninia jerente ida mak Rosito Ruas aliás Nito no nia akompañador mak Helder Amaral rasik. Enkuantu vokalista rua hanesan Ovania ho Brandolinda ne’e rekruta hosi programa “Solo Vokal” iha Santer Talent Show 2018 ne’ebé sira na’in rua mak sai hanesan klasifikasaun dahuluk no daruak iha kompetisaun refere.

To’o oras ne’e daudaun Banda Múzika SANTER ofisialmente seidauk prodús album múzika ida maibe iha ona preparasaun no mehi atu prodúz ninia album perdana iha tinan 2020 nia rohan. “Banda Santer” harii ho objetivu atu anima no halibur joven sira iha atividade pastorál Parókia Santa Teresinha Ossú. Amadeu Cruz, membru ida hosi banda haktuir katak mezmu sira hahú ho sasan ka ekipamentu limitadu maibé sira sei esforsa aan hodi apoiu malu ho sasan ne’ebé personál ida-idak nian iha atu bele fasilita sira nia atividade iha múzika.

“Bainhira ita iha esforsu ho mehi, ita-nia hakarak sira-ne’e hotu sei sai realidade iha loron ikus,” dehan membru Banda Múzika SANTER, Amadeu Cruz ba kontribuidór TATOLI, iha Ossú, foin lalais ne’e.

Durante ne’e, SANTER halo ona animasaun múzika oin-oin iha área sira Ossú nian, hahú hosi Parókia (iha atividade sira ne’ebé organiza iha nível parókia) no sira mós halibur no anima ona parokianu Ossú nian iha Estasaun Minisionáriu 20 resin ne’ebé eziste iha Parókia Ossú nia mahon. Múzika sira ne’ebé dala barak sira lori hodi anima komunidade sira mak múzika relijioza aleinde múzika sira seluk.

Ekipa Banda Muzika SANTER. Imajen/Memensio Sequeira Freitas.

Iha ámbitu komemorasaun festa Padroeira Santa Teresinha ba dala-83 foin lalais, Banda Múzika SANTER sai nu’udar uma-na’in hodi hamutuk ho ekipa animadora parókia nian konvida ona banda múzika sira seluk hosi Dili hanesan Ovid-16, Família Alkatraz (Soldadu Negro), Banda Wins Angle no Banda Maun-Alin hodi fó animasaun ba komunidade Ossú tomak iha loron 30 fulan Setembru kalan. Antes fó tempu ba banda sira ne’eb’e mai hosi Dili, Banda Múzika SANTER aprezenta mós sira-nia múzika rua hanesan “Inan Ramelau” no “Fiel”.

Banda múzika ida-ne’e sei la’o ho ekipamentu ne’ebé limitadu tebe-tebes maibé hein katak ba oin, ho esforsu tomak ne’ebé iha bele dezenvolve liután banda ida-ne’e atu bele sai banda boot ida hanesan ho banda sira seluk. Esforsu sira sei kontinua la’o hosi personál banda nia rasik hamutuk ho nia jerente no akompañadór, hosi ekipa animadór parókia nian no hosi amu pároku rasik atu oinsá mak bele kompleta tan ekipamentu adekuadu sira-ne’ebé banda presiza. Hein katak, Banda Múzika SANTER sai tebes banda múzika ida-ne’ebé famozu, animadu no amadu iha rai doben Ossú-Ossoroa no iha Timor-Leste laran tomak.

Notisia Relevante: Aniversáriu Parókia Ossú, ekipa animasaun sei realiza “Noite Kulturál”

Kontribudór: Memensio Sequeira Freitas

Editór: Cancio Ximenes

HAKEREK NO HATÁN

Please enter your comment!
Please enter your name here