Sekretáriu Estadu Kooperativa, Elizário Ferreira. Imajen Tatoli/Jogerjo Guterres

DILI, 12 outubru 2020 (TATOLI)—Sekretaria Estadu Kooperativa (SEKoop) hahú halo levantamentu produtu cesta bázika no iha tempu badak nia laran sei hahú kompra produtu.

“Kalendáriu levantamentu hahú ona iha semana kotuk no baze levantamentu dadus organiza ho kompradór sira, tuir mai iha loron 30 novembru ne’e sei halo lansamentu kompra produtu iha Suai,” dehan Sekretáriu Estadu Kooperativa, Elizário Ferreira iha Federasaun Hanai Malu, Bairro Pité, segunda ne’e.

Produtu ne’ebé parte SEKoop sei sosa hodi partisipa iha programa cesta bázika maka foos, koto, fore mungu, fore keli, fore rai,  no seluk tan.

Orsamentu ne’ebé prevee ba SEKoop hodi halo kompra ba produtu cesta bázika hamutuk millaun $24,1, inklui ona kustu operasionál hotu atu serbisu sira la’o ho di’ak.

Notísia Relevante: Rekuperasaun ekonómika: prevee millaun $113,4 ba medida haat kurtu prazu

Faze distribuisaun produtu ba populasaun iha territóriu tomak sei realiza iha semana daruak dezembru.

Iha distribuisaun ne’e, parte SEKoop responsabiliza iha munisípiu neen hanesan Aileu, Ainaro, Covalima, Same, Manatuto no Liquiçá.

Kona-ba kompra produtu cesta bázika iha baze ba kooperativa, membru sira maka sei organiza sosa.

“Maibé ne’e ba kooperativa ne’ebé hetan rekoñesimentu legál liuhosi lisensa rejistu komérsiu ninian, iha diresaun nasionál rejistu notariadu Ministériu Justisa,” nia akresenta.

Governante ne’e dehan, kooperativa ne’ebé partisipa presiza rejistu hodi bele fornese produtu ba programa Governu iha kurtu prazu ne’e.

“Agora iha kooperativa 42 maka iha ona rejistu no prontu atu partisipa. Produtu cesta bázíka la’ós hosi SEKoop de’it maibé envolve mós grupu médiu no pequena empreza sira, ka kompañia lokál ne’ebé maka iha kapasidade, kooperativa loke odamatan ba hotu-hotu atubele sosa hodi distribui,” nia informa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here