Kay Rala Xanana Gusmão. Foto António Goncalves

DILI, 11 outubru 2020 (TATOLI)—Eis Primeiru-Ministru, Kay Rala Xanana Gusmão, hateten ema ida hetan konfiansa polítiku tanba hatudu hahalok ho onestidade, idoneidade no diálogu.

Notisia Relevante: Rezultadu konferénsia nasionál 1981 halakon supremasia no hahoris polítika unidade nasionál

Xanana hateten nia parte nunka hakarak habosok nia aan-rasik katak nia bele aprezenta-aan hanesan fali peritu ida iha asuntu konsitusionál tanba nia mós nunka frekuenta universidade ruma, maibé esperiénsia iha vida ne’ebé difísil tebes hanorin konfiansa ba podér polítiku ruma.

“Konfiansa ne’e ‘não se ganha’ katak la obriga ema ida atu fó konfiansa mas ‘conquista-se’ katak konfiansa ne’e mosu hosi ita-nia hahalok ba ema seluk. Liuliu, konfiansa ne’e só bele mosu bainhira podér polítiku ida hatudu ‘idoneidade, diálogu no honestidade,” Xanana Gusmão ko’alia kestaun ne’e bainhira sai oradór ba semináriu ne’ebé organiza hosi Universdade Nasionál Timor Lorosa’e (UNTL) liuhosi Fakuldade Siénsia Sosiál hala’o semiáriu ida ho tema “Com o espírito nacionalismo e patrotísmo desta comunidade académica da FCS-UNTL no âmbito de comemorar XX aniversário da UNTL ho sub-tema “um país, um povo e uma identidade”, iha Salaun Ian Martin INFOREPE, Balide, sábadu ne’e.

Iha parte seluk, Eis Prezidente Repúblika ne’e hateten estadu direitu demokrátiku ne’ebé estabelese no separa tiha ona ninia forsa seguransa interna no forsa defeza, ho misaun no kompeténsia ne’ebé la hanesan.

“Bele ka lae destaka (haruka) militár sira atu kontrola manifestasaun pasífika no autorizada tiha ona hosi polísia nasionál. Liberdade espresaun, ne’e direitu konstitusionál ida. Nune’e, karik bele hanoin katak iha dúvida kona-ba manifestasaun bele la la’o pasífika, la’ós ho ameasa hata’uk ninian, mak forsa armada sira proteje Estadu hosi dezestabilizasaun maibe kontráriu bele fali provoka ka hamosu dezestabilizasaun. Ka, ita seidauk aprende hosi krize 2006 nian, ne’ebé forsas armada duni mak provoka,” Xanana Gusmão haktuir.

Eis Primeiru-Ministru ne’e dehan, asuntu sira-ne’e hotu pertinente duni atu reflete kona-ba ekilíbriu iha sistema polítiku iha Timor-Leste, iha-ne’ebé salutar duni (saudável tebes) se iha sistema kontrapezus (katak, ida labele hanehan fali ida seluk) entre prezidensiál no maioria parlamentár, maioria ne’ebé fó apoiu ba Governu tanba sistema ne’ebé adopta iha Timor-Leste la’ós sistema prezidensiál.

Nia husu ema hotu presiza atu reflete kona-ba faktu ne’ebé mosu ho koligasaun partidu naksobu tiha maibé la lori ba formasaun Governu foun tuir regra demokrátika.

Tanba buat ne’ebé akontese, la’ós remodelasaun simples ida maibé aliñamentu polítiku foun ida ne’ebé tenke aprezenta vizaun estratéjika no programa polítiku diferente, ne’ebé obriga atu submete programa foun ba aprovasaun hosi maioria iha Parlamento Nasionál hodi bele garante transparénsia no sentidu responsabilidade ba Povu ne’ebé sira reprezenta.

“Ita nunka bele haluha katak elementu prinsipál ba demokrasia maka Povu. Hosi Povu mak ita iha Konstituisaun ida, ne’ebé tenke fila ba Povu hodi garante katak podér polítiku hala’o tuir saida mak Konstituisaun determina tiha ona,” pozisaun Xanana Gusmão nian atu hakotu situasaun polítiku atuál.

Ko’alia kona-ba partidu polítiku, Xanana Gusmão konvida sosiedade timorense tomak no liuliu konvida juventude atu eskrutina ka haree didi’ak estatutu partidu polítiku sira-nian, ne’ebé estabelese ona no sira ne’ebé bele mosu tán. Partidu polítiku ida sai nu’udar instrumentu asaun ba sidadaun sira-ne’ebé, koletivamente, hakarak partisipa iha vida polítika País nian.

Maibé, partidu hotu-hotu tenke orienta-aan hosi vizaun ida, atu nune’e karik eleitu bele kumpre ninia misaun. Iha partidu ne’ebé, iha sira-nia estatutu, aprezenta de’it mak estrutura partidu no la fó-sai liu hakarak sá-ida.

Nia fundamenta, piór liután iha partidu kontra fali regra demokrátika ne’ebé loloos tenke regula funsionamentu kualkér partidu nian hodi defende fali iha sira-nia estatutu, sistema autoritáriu ka ditadura nian, ema ida de’it nian ba organizasaun tomak mezmu ke ema ne’e la tama iha estrutura formál partidu nian.

“Kuandu ita konsente ka husik liu de’it katak partidu polítiku ida la aprezenta ba Povu no ba eleitór sira ninia vizaun estratéjika, kona-ba tansá mak mosu nu’udar partidu ne’e, ita sei hasoru beibeik ho falta kapasidade hosi partidu sira-ne’e, atu elabora programa asaun bainhira karik sira simu knaar,” Xanana fó hanoin.

Eis Prezidente Repúblika ne’e hateten, só vizaun estratéjika, ne’ebé define ona ho didi’ak mak partidu polítiku ida bele hakbiit-aan atu kumpre, ativa no responsavelmente ninia misaun kona-ba konstrusaun Estadu no iha prosesu dezenvolvimentu sosio-ekonómiku nasaun-nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here