Projetu PPP portu Baía Tibar. Imajen/Espesiál.

DILI, 10 outubru 2020 (TATOLI)—Progresu ba kontrusaun projetu Baía ne’ebé lokaliza iha Suku Tibar, Postu Administrativu Bazartete, Munisípiu Liquiçá to’o fulan-abríl 2020 atinje ona 25,37%.

Projetu refere ho tipu modalidade PPP ne’ebé hili ba Portu Baía Tibar mak konsesaun ho tinan tolu (3) inklui dezeña, finasiamentu parsiál, konstrusaun, operasionál  no  manutensan  ba  infraestrutura portu  nian.

Akordu konsesaun ne’e asina iha fulan-juñu 2016 no períodu de fecho (Financial Closing) atinje iha fulan-agostu 2018.

“Projetu ne’e agora daudaun iha faze konstrusaun ho progresu konstrusaun atinje ona 25,37% até fulan-abríl 2020, servisu dragajen no reklamasaun finaliza ona, stone column kompleta 33% no dezeñu detalladu kompleta 92%,” progresu refere Agência TATOLI asesu, ohin, liuhosi Livru 1 (panorama orsamentál) ne’ebé asina hosi Ministru Finansa, Fernando Hanjam.

Iha dokumentu livru orsamentál ne’e fó-sai katak provizoriamente estimasaun kona‐ba inisiu operasaun sei hahú iha fulan-agostu 2021 maibé diskusaun sei la’o hela hosi parte Grantor  no konsesionáriu hodi haree posibilidade estende data inisiu operasaun hosi fulan-agostu ba fulan-maiu 2022 tanba surtu COVID‐19, ne’ebé propoin hosi Timor Port S.A.

Projetu PPP portu Baía Tibar envolve provizaun ba finansiamentu lakunas viabilidade (Sigla Inglés‐Viability Gap Funding/VGF) ho montante millaun $$129.5 nu’udar partisipasaun finanseiru Governu nian iha 2016 (registradu hanesan despeza 2016 nian) ba terraplenajen, konstrusaun no kompra ekipamentu.

Konstribuisaun setór privadu ba projetu ne’e hamutuk millaun $153.87 ne’ebé signifika kontribusaun finanseira hosi Governu besik 45% hosi kustu totál.

Atu mantein VGF to’o dezembolsu akontese, tuir kontratu Governu iha obrigasaun atu depozita osan ho valór totál iha konta kustódia (Escrow  Account) ida. Ba objetivu ida-ne’e, akordu kustódia (Escrow Agreement) ne’ebé harii hosi parte tolu: Governu Timor Leste, kompañia Timor Port SA no Banku United Overseas Bank (UoB) iha Singapura iha fulan-novembru 2016.

Atualmente, dezembolsu tolu maka akontese ona hosi konta kustódia, dezenbolsu rua (2) hala’o iha 2019 no ida iha 2020. Osan ne’ebe hatuur iha konta kustódia ne’e mós hetan funan. To’o 1 Juñu 2020, osan funan ne’ebe konsege hetan hamutuk millaun $8.23 no depozita iha konta osan funan kustódia (Escrow Interest Account).

Akordu kustódia estipula katak osan 56 funan ne’ebé hetan ona só bele transfere ba  kofre Governu hafoin taka konta ka terminasaun akordu kustódia.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here