Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão

DILI, 10 outubru 2020 (TATOLI)–Governu liuhosi Instituisaun Nasionál Seguransa Sosiál (INSS) finaliza ona pagamentu 60% ba traballadór hamutuk rihun 10-resin ho montante rihun $7.

“Ita-nia pagamentu 60% ba traballadór ne’e finaliza ona iha fulan setembru no selu ona ba traballadór hamutuk rihun 10-resin. Hosi osan miliaun $7 ne’e, $4,5 selu ba 60% no $2,5 selu ba 6%,” dehan Prezidente Autoridade INSS, Longuinhos Armando Leite ba Agência TATOLI, iha Parlamentu Nasionál, sesta ne’e.

Nia hatutan, maske pagamentu ramata ona maibé INSS simu reklamasaun haat ka lima maibé rezolve hotu ona. Daudaun ne’e, tuir nia, hein de’it bainhira iha kompañia balun mak justifika entaun INSS bele halo pagamentu maibé to’o agora laiha justifikasaun.

Entretantu, nia informa, pagamentu ba idozu nian iha territóriu Timor-Leste kuaze hotu ona no daudaun ne’e INSS simu reklamasaun balun hosi suku no aldeia maibé seidauk hatene katak reklamasaun tanba mate ka halo hela servisu seluk.

“Ita seidauk hatene objetivu hosi reklasamasaun hirak ne’e tanba ita seidauk halo pagamentu hotu. Bainhira tinan ne’e ramata ona mak foin hatene katak idozu hira mak mate ona,” nia esplika.

Nia haktuir, ema kuaze rihun 24 mak lahalo movimentu hahú hosi tinan 2019 nian mai to’o agora maibé seidauk hatene razaun hosi laiha movimentu ne’e.

“Ita hapara no estende tanba ema laiha movimentu bainhira ita-nia ekipa hamutuk ho banku ba halo pagamentu iha suku. Tanba ne’e, ita labele dehan ema ne’e mate. Ho nune’e ha’u labele fó sai uluk katak ema hira mak mate ona,” nia dehan.

Nia hatete ema ne’ebé mak laiha movimentu ka halo reklamasaun hamutuk 778 no INSS mós halo ona pedidu ba Banku Nasionál Komérsiu Timor Leste (BNCTL) atu selu fila fali.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here