Diretora Programa Nasionál Dezenvolvimentu Suku (PNDS), Claudina Soares Pires. Imajen TATOLI/Osória Marques.

DILI, 09 outubru 2020 (TATOLI)–Diretora Programa Nasionál Dezenvolvimentu Suku (PNDS), Claudina Soares Pires, hatete PNDS gasta tiha ona osan hamutuk tokon $5 no restu tokon $2 ne’e sei utiliza ba programa fulan rua ikus (novembru-dezembru).

“Programa PNDS nian ba tinan ne’e ho osan hamutuk $7,191,335 ne’ebé tokon $5 uza ba faze daruak nian no tokon $2 ne’e ita sei utiliza ba iha fulan rua  tuir mai ne’e,” dehan Diretora PNDS, Claudina Soares Pires, liuhosi telefónika ba jornalista Agência TATOLI, sesta (09/10/2020) ne’e. 

Tinan ida-=ne’e, Claudia Soares Pires, hateten totál orsamentu ne’ebé prevee ba PNDS hamutuk $7,191,335.

“Orsamentu DOT ne’e balu gasta ona ne’ebé orsamentu ne’ebé foin aprova tan ne’e restu de’it hosi orsamentu ne’ebé aprova horisehik ne’e balansu mak ita atu gasta. Maibé, balansu ne’e ita uza ba fulan rua ka tolu maibé restu ne’e gasta tiha ona,” nia hateten.

Nia dehan, PNDS nia programa ba fulan rua ikus tinan ne’e kontinua de’it programa ne’ebé mak seidauk finaliza tanba Governu implementa programa barak tebes hamutuk projetu 353 ne’ebé mak Governu sei halo liuhosi faze ida no rua. 

Aleinde ida ne’e, nia dehan, iha faze ida-ne’e PNDS hetan apoiu orsamentu hosi Governu Austrália purvolta millaun $7.7 atu bele hala’o projetu sira ne’ebé mak iha faze dahuluk hamutuk suku 152.  

Faze daruak ne’e, nia informa, kontinua uza Orsamentu Dotasaun Temporária (DOT) ba suku 101 ne’ebé maka sei implementa iha faze daruak iha teritóriu Timor laran tomak.

“Tinan ida ne’e ita sei kontinua programa sira ne’ebé antes ne’e ita hetan ona orsamentu hodi finánsia. Aleinde ida-ne’e, ami-nia ekipa mós prepara halo hela survei agora daudaun ha’u iha Munisípiu Aileu  hodi survei hela ba iha sede suku sira atu bele halo reabilitasaun sede suku sira ne’e. Tinan ida-ne’e, ita reabilita sede suku hamutuk 149,” nia hateten.

Programa sira ne’e, nia dehan, implemanta iha 2020 nia-laran maiória implmenta iha fulan setembru nia-laran.

Faze dahuluk ne’ebé nia osan ne’ebé tama iha konta bankária suku nian foin maka tama semana kotuk ne’ebé ekipa terrenu halo hela survei no agora finaliza ona ne’ebé sira agora dezeña hela BIQ.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here