Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (09/10). Imajen Tatoli/Egas Cristovão

DILI, 09 outubru 2020 (TATOLI)Iha reuniaun Konsellu Ministru (KM) sesta ne’e, Ministru Justisa (MJ), Manuel Cárceres da Costa, aprezenta opsaun polítika lejizlativa kona-ba ezekusaun, esplorasaun no asesu ba informasaun kadastrál, rejime prediál, fundu finanseiru imobiliáriu, rejime jurídiku ba zona protesaun komunitária no ba bein imóvel komunitáriu sira.

Ministru Prezidénsia Konsellu Ministru, Fidelis Manuel Leite Magalhães, informa katak pakote lejizlativa ne’e importante ba implementasaun lei rai iha futuru.

“Bainhira pakote ne’e pasa karik, iha futuru sei ajuda liután rezolve lakuna ne’ebé iha relasiona ho aplikasaun no lakuna normativa no direitu propriedade nian,” tenik Ministru Fidelis hafoin ramata reuniaun KM iha Palásiu Governu.

Governante ne’e hatutan, pakote ne’e importante  ba nasaun, tanba ne’e bainhira Konsellu Ministru iha tempu oin mai aprova maka medida hirak ne’e sei kontribui ba implementasaun lei rai no propriedade.

Hakarak mós favorese ba komérsiu jurídiku imobiliáriu no dezenvolvimentu ekonómiku inklui fó siguransa ba sidadaun kona-ba protesaun direitu imóvel sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here