DILI, 09 outubru 2020 (TATOLI)-Prokudór Jerál Repúblika (PGR), José Ximenes, hateten, Ministériu Públiku (MP) presiza hametin liután nia investimentu iha area rekursu umanu hodi lori justisa serve povu ho di’ak liután.
Notísia Relevante : MP iha papél importante defende ema kbiit-laek
José Ximenes, hateten, durante ezisténsia Ministériu Públiku (MP) to’o ohin kompleta ona tinan-20 iha buat barak mak atinje ona iha vida instituisaun ne’e nian
Buat ne’ebé atinje, tuir José Ximenes, iha komemorasaun ne’e bainhira haree fila-fali ba 2007 MP iha de’it majistradu ka Prokudór na’in-sia (9) no ofisial justisa laiha, maibé agora daudaun iha majistradu ka prokuradór na’in-37, ofisiál justisa na’in-95, funsionáriu apoiu tékniku apoiu servisu administrativu na’in-106.
“Agora buat ne’ebé sai baze ba ita atu hametin la’ós númeru ne’ebé mak agora iha, maibé presiza investe forte ba rekursu ne’ebé ita iha hodi reforsa no defende instituisaun ida ne’e atu lori justisa ba povu ho di’ak liután,” hateten José Ximenes ba jornalista, iha ámbitu komemorasaun aniversáriu Ministériu Públiku ba-dala-20, ohin, iha salaun enkontru Ministériu Finansas, Dili.
Nia hateten, papél MP nian hanesan na’in ba asaun penal hodi defende interese Estadu nian hodi halo investigasaun ba krime organizadu, transnasional, korrupsaun ho seluk tan.
MP mós iha Ministériu Públiku Distritál haat hanesan Dili, Baucau, Suai, no Oe-cusse no daudaun ne’e instala tan ona reprezentasaun MP nian iha Munisípiu Ermera, Viqueque, Bobonaro no iha Lautem nia prosesu la’o hela hodi lori justisa besik ba povu.
José Ximenes kompara avansu ne’ebé iha tuir dadus estatístika jerál MP nian iha tinan 2009 iha prosesu kazu pendente 9,000 no iha 2013 tun ba iha 5,000, maibé 2020 daudaun ne’e iha de’it 2,800 ne’ebé antes ne’e iha tinan 2019 iha kazu pendente besik 2,000 no prosesu kazu foun iha 2020 hamutuk 2,000-resin.
“Ne’e signifika iha tinan-10 ba kotuk, maibé agora prosesa hotu movimenta la paradu mezmu ho de’it majistradu nain-33 ativu ka’er prosesu,” José Ximenes dehan.
Biban ne’e José Ximenes, hateten, estatutu MP atuál ne’e iha ladún atualizadu ona tanba ne’e hein katak Governu liuhosi Ministériu Justisa (MJ) halo ona revizaun bele iha desizaun Konsellu Ministru no ba Parlamentu, kuandu aprova sei mellora liután instituisaun ne’e nian.
Kona-ba lei organizasaun judisiáriu ne’ebé MJ prepara hela hein katak sei kontribui hodi dezenvolve liután setór justisa iha Timor-Leste, tanba tinan-20 ona sistema judisiáriu ne’ebé harii hanesan Tribunál, Ministériu Públiku uza regulamentu iha tempu UNTAET ne’ebé agora la atualizadu ona ho situasaun ohin loron.
Jornalista : Nelson de Sousa
Editór : Francisco Simões
