Komandante PNTL Munisípiu Baucau, Superintendente Xefe Armando Monteiro. Imajen Tatoli/António Gonçalves

DILI, 09 outubru 2020 (TATOLI)- Komandante Polísia Munisípiu Baucau, Superintendente Xefe Armando Monteiro, informa, nia-parte hahú implementa programa konsolidasaun paz ho juventude, grupu organizasaun arte marsiál (GAM) no autoridade lokál sira hodi  hametin unidade, amizade iha sosiedade nia leet.

Armando dehan, konsolidasaun paz ne’e halo hodi  redús kazu krime ne’ebé akontese iha Baucau.

“Ita iha faze konsolidasaun juventude ligadu ho problema no konflitu entre juventude ne’ebé akontese iha pasadu tanba ne’e liuhosi koordenasaun no komunikasaun ho lider komunitária, veteranu, intelektuál, juventude no organizasaun arte marsiál no rituál iha faze reuniaun, oinsá atu kria ekipa Task Force ida halo kampaña paz ho finalidade maka halo konsolidasaun deklarasaun kompromisu dame ne’ebé sei halo iha tempu badak,” informa Superintendente Xefe  Armando Monteiro, ba jornalista, ohin, iha Dili.

Superintendente Armando hatutan, foin lalais ne’e nia parte hatún ona despaxu hodi muda membru PNTL hodi unidade balun muda ba suku balun hodi hala’o knaar nu’udar Ofisiál Polísia Suku (OPS).

Programa seluk tan maka, Komandu PNTL Baucau sei estabelese Konsellu Polisiamentu Komunitáriu (KPK) iha suku-45 iha area jurisdisaun Munisípiu Baucau nian.

Nia hatutan, servisu OPS no KPK sei koordena ho autoridade suku sira para lori Dili sai fatin seguru no fatin dame ba ema hotu-hotu atu livre hala’o ninia servisu livre hosi konflitu no krime sira.

PNTL Baucau kontinua implementa mós programa Servisu Seguransa Rodoviáriu hodi kontrola movimentu transporte sira labele viola regra sinais tránzitu nian.

Jornalista   : Eugénio Pereira

Editór        : Francisco Simões