Deputadu Partidu Demokrátiku (PD), Adriano do Nascimento. Imajen TATOLI/António Goncalves

DILI, 08 outubru 2020 (TATOLI)-Deputadu Partidu Demokrátiku, Adriano do Nascimento, hateten proposta-lei OJE 2020 ne’ebé pasa iha Parlamentu Nasionál hakotu ona rejime duodesimál durante ne’e.

“Orsamentu ida ne’e hanesan orsamentu ida ne’ebé ke ita hein hodi hakotu rejime duodesimál tanba rejime duodésimu ne’e limita Estadu, limita Governu atu responde nesesidade povu no nasaun nian,” dehan Adriano, hafoin fó votu afavór ba OJE 2020 iha plenária, kinta ne’e.

Notísia Relevante :Prezidente Komisaun C-PN: Impaktu Orsamentu Duodesimál Halo Ekonomia Rai-Laran Monu

Tuir nia OJE 2020 mós fó biban ba Governu atu restaura dezintendimentu, difikuldade  no apoiu di’ak liután funsionamentu mákina Estadu.

“Orsamentu ida-ne’e mós fó esperansa ba Governu ida ne’e atu bele fó esperansa hikas ba povu no ba Nasaun nune’e bele hatuur kredibilidade Estadu Timor-Leste nu’udar nasaun ida iha mundu, ne’ebé ke hetan respeita nu’udar nasaun ukun rasik aan,” nia hateten.

Entretantu, Dotasaun Temporáriu Orsamentál (DOT) limita de’it ba 1/12 hosi orsamentu orijinál tinan kotuk maka bele fahe kada fulan. Ida ne’e signifika funsaun esensiál Governu nian bele kontinua maibé polítika balun ne’ebé fora hosi atividade anuál labele implementa, inklui  projetu infrastrutura importante balun.

Notísia Relevante :OJE 2020 nu’udar orsamentu esperansa retoma rekuperasaun

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here