Profesionais mediku husi Ministeriu Saude nebe atende abitante sira iha kuarentena Tasitolu.Imajen/TATOLI

DILI,09 Outubru 2020 (TATOLI)-Ministériu Saúde ho Komisaun Funsaun Públika, sesta ne’e, halo ona diskusaun ida kona-ba proposta atu halo promosaun ba Funsionáriu Ministériu Saúde liliu profisionál saúde nian hamutuk 3.700-resin ne’ebé oras ne’e, destaka iha munisípiu 12 inklui Enclave-Oe-Cusse ba iha rejime espesiál.

“Ohin, Ami hamutuk ho Komisaun Funsaun Públika hodi diskute kona-ba proposta atu halo promosaun ba iha funsionáriu Ministériu Saúde ba iha ba rejime espesiál nian,” informa Diretora Rekursu Umanu MS, Tomasia de Sousa, ba jornalista sira iha edifísiu Ministériu Saúde, Caicoli, Dili,ohin.

Iha tinan 2019 liubá Ministériu Saúde liuhosi despaxu ida husi Eis Ministra Interina, Elia dos Reis Amaral, hodi forma ekipa promosaun kompostu husi MS no KFP hodi elabora dokumentu no lista promosaun ba funsionáriu sira kompostu husi profisionál saúde sira.

Funsionáriu sira ne’ebé maka sei hetan promosaun presiza priense rekezitu sira, ida maka liuhosi avaliasaun dezempeñu servisu no seluk tan.

“Ami tenki tuun nafatin ba terrenu hodi verifika didi’ak hanesan ezemplu Aileu ne’e nia médiku hira, parteira hira, enfermeiru hira no tékniku aliadu hira ne’e ami tenki haree hotu ida ne’e para tinan-tinan ita halo avaliasaun dezempeñu,”dehan Diretora Rekursu Umanu MS.

“Ami hakarak tuun direta para verifika didi’ak informasaun sira ne’e para hato’o ba iha Komisaun Funsaun Públika no atraves Ministra Saúde nia aprovasaun atu nune’e hahú ona promosaun,” nia hateten.

Iha fatin hanesan Prezidente Komisaun Funsaun Públika, Faustino Cardoso, hateten diskusaun ohin nian hodi prepara planu promosaun ba funsionáriu Ministériu Saúde inklui Ospitál Nasionál Guido Valadares, Ospitál Referál sira, Sentru Saúde no Postu Saúde sira iha Timor-Leste.

“Ita ko’alia kona-ba profisionál saúde sira mak iha médiku jerál, médiku espesialista sira,  enfermeiru, parteira, tekniku aliadus, farmasista no seluk tan tanba tuir dekretu lei númeru 5 /2019 ne’ebé ko’alia kona-ba rejime promosaun ba iha administrasaun nian, aliende rejime ba promosaun jerál ne’ebé Funsaun Públika hala’o ona tinan kotuk 2019,” dehan Faustino Cardoso.

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here