Prezidente Repúblika, Francisco Guterres 'Lú-Olo' no Prokuradór Jerál Repúblika, José Ximenes hasai foto hamutuk ho autór judisiariu sira iha aniversariu Ministériu Públiku ba-dala-20 iha salaun Ministériu Finansa, Dili 09 setembru 2020. Imajen Tatoli/Egas Cristovão

DILI, 09 outubru 2020 (TATOLI)-Prezidente Repúblika (PR), Francisco Guterres “Lú-Olo’’, hateten lei organizasaun judisiária ne’ebé daudaun Governu liuhosi Ministériu Justisa (MJ) prepara sei ajuda liután ba dezenvolvimentu orgaun judisiária iha Timor-Leste.

Notísia Relevante : PR Lú-Olo dezeja Ministériu Públiku

“Lei  organizasaun judisiária detallada no kompletu ajuda tebes órgaun judisiáriu sira hala’o mandatu ho seguransa jurídika di’ak liu no tuir kompeténsia sira ne’ebé konstituisaun haruka. Ita hein katak lei foun ne’e sei konsidera esperiénsia no haree ba realidade atuál no haree mós ba oinsá mak sistema judisiáriu sei lao ba oin, tuir realidade Timor-Leste nian,” hateten  PR Francisco Guterres ‘’Lú-Olo’’ iha nia diskursu iha ámbitu komemorasaun aniversáriu ba-dala-20 Ministériu Públiku, ohin, iha edifísiu Ministériu Finansas, Dili.

Nia hateten, liu ona tinan barak bainhira sura hosi tempu harii komisaun tranzitória servisu judisiál, iha períodu administrasaun tranzitória Nasoins Unidas (UNTAET), nu’udar órgaun konsulta no fó rekomendasaun ba administradór tranzitóriu, ne’ebé  iha tempu ne’ebá  iha responsabilidade foti desizaun polítika, lejizlativa, ezekutiva no tau matan ba sistema judisiál.

PR Lú-Olo haktuir, liuhosi regulamentu relevante sira hatún hosi UNTAET, administradór tranzitóriu mak hili  nomeia no determina karreira ba majistradu judisiais  no mós ba pesoál prokuradoria públika. Tuir fali, UNTAET harii iha 2000, Tribunal apelasaun no Tribunál Distritál sira, no mós Prokuradoria Públika no asisténsia judisiária.

“Ita bele dehan katak instituisaun sira ne’ebé ita iha ohin loron, hanesan Tribunal Rekursu, Tribunal Distritál sira no Ministériu Públiku, harii tinan rua nulu liubá. Ita komprende katak kuadru legal mínimu UNTAET hatuur molok ita restaura independénsia sei nafatin afeta ita-nia instituisaun sira ohin-loron. Tribunal Rekursu, Tribunal Distritál sira no Ministériu Públiku no mós Defensoria Públika no Asisténsia Judisiária kaer nafatin regulamentu balun hosi kuadru legal UNTAET nian iha sira-nia organizasaun no funsionamentu,” hateten Lú-Olo.

Nia dehan, ida ne’e akontese nafatin enkuantu Parlamentu Nasional no Governu la revoga regulamentu-sira hatuur hosi UNTAET kona-ba órgaun no instituisaun-sira ne’ebé halo parte  sistema justisa.

“Hafoin ita restaura independénsia, ita halo mudansa balun hodi hadi’ak regulamentu no instituisaun sira iha sistema justisa. Enkuantu ita hadi’ak  daudaun ita-nia sistema justisa ita tenke hatutan mós órgaun-sira no servisu judisiáriu-sira hodi rezolve konflitu no halo kontrolu sosiál,” Lú-Olo tenik.

Nia hatutan, Tribunál sira no Ministériu Públiku, no instituisaun-sira seluk sistema judisiáriu nian konsege-hetan kualidade no hatuur-aan nu’udar riin ba justisa demokrátika, independente no imparsiál, no hatuir de’it lei ka norma jurídika Estadu nian, bainhira sai ona komponente importante ba Estadu-de-direitu demokrátiku, soberanu, independente no unitáriu Timor-Leste, Estadu ida ne’ebé bazeia ba vontade Povu nian no tau aas dignidade ema nian.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here