Primeiru-Ministru, Taur Matan Ruak, prezide reuniaun Konsellu Ministru estraordinária, iha Palásiu Governu, sesta (09/10). Imajen Tatoli/Egas Cristovão

DILI, 09 outubru 2020 (TATOLI)Iha reuniaun Konsellu Ministru (KM) sesta ne’e, Ministru Obra Públika, Salvador Eugênio Soares dos Reis Pires, aprezenta projetu deliberasaun ne’ebé refere ba prosedimentu aprovizionamentu hodi altera kontratu ba obra reabilitasaun estrada dirasaun Dili-Manatuto.

Diploma ne’ebé hetan aprovasaun ne’e, hodi estende prazu entrega obra to’o loron 24 fevereiru 2021 maibé la implika kustu inisiál.

”Tanba razaun téknika balun inklui tempu, Governu deside estende tempu entrega projetu estrada maibé sein aumentu ba kustu,” relata Ministru Prezidénsia Konsellu Ministru, Fidelis Manuel Leite Magalhães hafoin ramata reuniaun KM iha Palásiu Governu.

Notísia Relevante: Governu Finaliza Ona Kontratu Fiskalizasaun ba Reabilitasaun Estrada Hera-Manatuto

Finansiamentu projetu reabilitasaun estrada ne’e hosi Orsamentu Jerál Estadu (OJE) 2019 no mós fundu empréstimu hosi Governu Japaun liuhosi Ajénsia Kooperasaun Internasionál Japaun (JICA, sigla inglés).

Nune’e, obra reabilitasaun fahe ba trosu rua, hosi Dili ba Manatuto konstrusaun hahú iha loron 30 jullu 2016 no ramata ona loron 25 abríl 2019, iha ponte Lakló (Manatuto) ho nia naruk kilómetru 48,74.

Empreza ne’ebé kaer obra ne’e mak Sinohydro Corporation Limited husi Xina ho kustu totál millaun $48,87.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here