Vise Xefe Bankada FRETILIN, Francisco Miranda Branco. Imajen Tatoli/Egas Cristóvão

DILI, 08 outubru 2020 (TATOLI)-Bankada Frente Revolusionária Timor-Leste Independente (FRETILIN) husu ba Governu ne’ebé lidera husi Primeiru-Ministru, Taur Matan Ruak, atu hadi’a liña koordenasaun inter-ministeriál iha instituisaun estadu nian.

“Iha oportunidade ida-ne’e Bankada FRETILIN apela ba Primeiru-Ministru no membru Governu hotu, atu hadi’a no hametin liután liña koordenasaun inter-ministeriál no entre instituisaun sira hotu, nune’e bele implementa polítika VIII Governu nian ho efisiénsia no efikásia, hasa’e kualidade serbisu, kualidade projetu, tuir prinsípiu transparénsia no boa governasaun,” Xefe Bankada FRETILIN, Francisco Miranda Branco, bainhira lee deklarasaun partidu nian ne’e iha ámbitu debate finál ba espesialidade proposta-lei nº 22/v(3ª), iha plenária, Parlamentu Nasionál, kinta ne’e.

Nia husu ba Partidu Polítiku sira hotu no sidadaun Timor-Leste atu kuda nafatin kultura diálogu hodi tau aas interese komún duke interese partidária no grupu.

“Opozisaun sim, mas diálogu maka parte ida importante liu iha demokrasia, iha pluralizmu polítiku iha-ne’ebé la esklui ema ida,” dehan nia.

Maske nune’e Bankada FRETILIN sauda no kumprimenta opozisaun, tanba sira mós nu’udar amigu iha uma-lulik Repúblika Demokrátika Timor-Leste nian, nune’e mós husu opozisaun bele simu realidade polítika ne’ebé hatúr sira ohin loron iha opozisaun.

Nia dehan FRETILIN espera  opozisaun bele ultrapasa situasaun ne’ebé oras ne’e daudaun sira hasoru maka situasaun post power syndrome.

Partidu istóriku ne’e mós kongratula ema hotu-hotu ne’ebé halo esforsu durante audiénsia públika no ikus mai vota ba projetu-lei Orsamentu Jerál Estadu 2020 hodi viabiliza Governu ba situasaun ida-ne’ebé konfortavel liután.

FRETILIN fó valór aas ba polítika VIII Governu Konstitusionál, ne’ebé lidera hosi Primeiru-Ministru, Taur Matan Ruak, hodi hatuur ema iha sentru ba polítika dezenvolvimentu nasionál.

“Tanba tinan naruk, ita la hatuur ema nu’udar sentru ba polítika dezenvolvimentu nasionál, ita bele haree númeru konkretu setór saúde nian ita la fó atensaun, setór edukasaun ita la fó atensaun di’ak, turizmu ita la fó atensaun di’ak no agrikultura ne’ebé ita-nia povu 70% moris ba, ita haluha tiha”, dehan Xefe Bankada FRETILIN.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here