Eskola Ensinu Sekundária Tékniku Vokasionál (ESTV)-Eskola Ekonomia no Komérsiu Becora (EEC-sigla portugés). Foto espesiál

DILI, 09 outubru 2020 (TATOLI)-Diretór Nasionál Ensinu Sekundária Tékniku Vokasionál, Ministériu Edukasaun Juventude no Desportu (MEJD), João Maupelo, hateten totál estudante finalista hamutuk 5.465 husi eskola tékniku vokasionál 58 iha Timor-Leste  sei partisipa ezame nasionál.

Tuir kalendáriu ne’ebé fó sai ona husi MEJD katak ezame nasionál sei realiza iha loron 16 to’o 21 fulan novembru 2020.

Notísia Relevante :Estudante finalista ESG na’in 20.145 sei tuir ezame nasionál

“Ha’u rejista ona dadus ne’e maibé ha’u labele garante katak dadus ne’e mak fiksu ona atu tuir ezame nasionál tanba bele akontese mudansa iha númeru sira. Maibé dadus update ne’e mak ema rihun 5.456”, nia informa dadus ne’e ba Tatoli, iha ninia servisu fatin MEJD Vila Verde, sesta ne’e.

Mezmu nune’e, nia tenik tan atu konfirma loloos dadus ne’e, maka Diresaun Nasionál Ensinu Tékniku Vokasionál  halo hela koordenasaun ho Servisu Edukasaun Munisipál hodi re-verifika númeru ne’e antes tama ba ezame nasionál.

“Maibé  ita espera katak unidade kuríkulu mós hatene no sira sei prodús matéria ezame nasionál ne’e tuir modelu ne’ebé bele apoiu estudante sira. Agora ita espera estudante sira bele adapta án atu bele intende didiak iha matéria sira hodi bele ultrapasa difikuldade ne’ebé sira hasoru iha ámbitu COVID-19 ne’e”, katak nia.

Entretantu, iha tinan 2019 liubá estudante finalista tékniku vokasionál  5.227 maka partisipa ezame nasionál.

Notísia Relevante :Problema COVID-19, MEJD elabora ona matríz ba ezame nasionál

Jornalista: Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here