Komandante Jerál PNTL, Komisáriu Faustino da Costa. Imajen Tatoli/António Gonçalves

DILI, 09 outubru 2020 (TATOLI)- Durante fulan setembru, tinan ne’e, mosu asidente tráfegu iha territóriu Timor-Leste ne’ebé rezulta vítima na’in-10 mate no ema na’in-38 sofre kanek todan.

Notísia Relevante : Relatóriu Polísia, ema na’in-48 mate tanba asidente tráfegu

 “Asidente ne’ebé akontese iha setembru, tinan ne’e, hamutuk 123 to’o asidente rodoviáriu ne’ebé rezulta ema na’in-10 mak mate no mós ema na’in-38 mak kanek todan,” informa Komandante Jerál PNTL, Komisáriu Faustino da Costa, ba  jornalista, hafoin aprezenta relatóriu servisu ba Prezidente Repúblika, Francisco Guterres “Lú-Olo”, iha Palásiu Prezidensiál Dili.

Komisáriu PNTL aprezenta mós servisu PNTL hodi halo kontrolu ba movimentu transporte públiku no apreensaun ba transporte sira ne’ebé viola lei kódigu estrada hetan sansaun infrasaun hamutuk 1.355.

“Ita hotu akompaña iha kapitál Dili ne’ebé ita halo pasa revista dala-178 no ita identifika infrasaun ne’e hamutuk 1,355 hosi númeru ne’e maka ita prega multa ba motorista no transporte sira tanba barak maka dokumentu laiha, tantu karreta no ema nian, nune’e iha setembru nia laran ita hetan koíma hamutuk $32,480 hatama ba kaixa Estadu,” Komisáriu Faustino da Costa hateten.

Kona-ba sitasaun seguransa agora iha territóriu Timor-Leste, Faustino da Costa, hateten, la’o di’ak no PNTL reforsa seguransa maka’as liu iha área liña fronteira terrestre no tasi nian.

Iha parte seluk, Komandu PNTL aprezenta mós kazu krime omisídiu ne’ebé hamate aman no oan iha Postu Administrativu Laclo, Munisípiu Manatuto no kazu tentativa omisídiu ne’ebé akontese iha Munisípiu Manufahi ninia prosesu PNTL aprezenta ona ba Ministériu Públiku.

Komisáriu Faustino relata mós kazu agresaun fíziku hosi estudante Eskola Désimu Primeiru Anu, São Jose Operario Balide, Dili, na’in haat ne’ebé halo torturasaun ba vítima Estudante Eskola Désimu Primeiru Anu Kristal, Cesarmino Moy da Silva, tinan 16, iha área Kristal, Balide, Dili.

Suspeitu estudante menoridade hirak ho inisiál, JCS, IG, DS, no IP PNTL Munisípiu Dili halo ona prosesu investigasaun.

“Kazu ne’ebé viral loos estudante balun hetan baku iha área Kristál ninian prosesu la’o hela mesak ema menoridade de’it,” nia hatete.

Iha parte seluk, Komisáriu Faustino da Costa, informa mós kona-ba PNTL garante nafatin implementasaun Estadu Emerjénsia (EE) hodi kontrola no taka metin liña fronteira terrestre no tasi.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here