Traballadór kompañia Handy Plastic hala’o atividade prodús saku plástiku, sesta (09/10). Imajen Tatoli/António Gonçalves

DILI, 09 outubru 2020 (TATOLI)—Traballadór timor-oan na’in-sia ne’ebé serbisu iha kompañia Handy Plastic, fulan-haat la simu saláriu maski durante períodu Estadu Emerjénsia (EE) kontinua serbisu.

Reprezentante traballadór, Damião Pereira, hateten sira nia parte eziji ona direitu maibé kompañia nia razaun laiha osan.

“Durante ami servisu fulan-haat ona kompañia na’in la selu ami no subsídiu ba COVID-19 fulan-rua nian mós ami la hetan, tanba ne’e ami husu ba Governu bele haree ba problema ne’e,” dehan traballadór ne’e iha armajen kompañia iha Hudi-laran, sesta ne’e.

Traballadór iha kompañia ne’e ho saláriu mínimu no bainhira serbisu liu oras maka iha aumentu oituan.

“Maski ami serbisu balun liu tinan lima maibé saláriu nafatin $115 no bainhira ami tama full hanesan segunda to’o sábadu loron sorin maka ami bele hetan $120,” nia informa.

Traballadór ne’ebé servisu iha kompañia ne’e kompostu hosi mane lima no feto haat.

Ba kestaun ne’e, Agência TATOLI tenta konfirma ho na’in ba kompañia xineza ne’e maibé rejeita fó informasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here