Diretór Engeñeria no Operasaun Timor Telecom, Francisco de Jesus Leite no ekipa, akompaña vizita kortezia Ministru Asuntu Parlamentár no Komunikasaun Sosiál, Francisco Jerónimo no komitiva iha edifísiu sentrál Timor Telecom, Timor Plaza, sesta (09/10). Imajen/MAPKOMS

DILI, 09 outubru 2020 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Jerónimo, halo vizita kortezia ba edifísiu sentrál Timor Telecom iha Timor Plaza hodi haree lala’ok serbisu operadór telekomuniksaun ne’e no iha tempu hanesan ko’alia kooperasaun ne’ebé bele halo iha tempu tuir mai.

Tuir Ministru, vizita ne’e hodi haree posibilidade kooperasaun serbisu iha futuru hodi apoiu dezenvolvimentu dijitalizasaun no infraestrutura ba Rádiu Televizaun Timor-Leste, empreza públika (RTTL,E.P).

“Sei iha tan diskusaun no haree ba tékniku hodi bele viabiliza atu koopera malu, atu nune’e ba futuru bele hetan solusaun di’ak liu,” tenik Ministru Francisco, hafoin vizita, sesta ne’e.

Timor Telecom iha relasaun kooperasaun ho RTTL kleur ona desde operadór telekomunikasaun ne’e opera iha marsu 2003.

“Dever hanesan Ministru haree kooperasaun ne’ebé la’o durante ne’e no tenke fortifika Timor Telecom nia hanoin, hakarak no preokupasaun durante sira ninia ezisténsia iha Timór tanba sira durante ne’e fornese ona rede telekomunikasaun ba timor-oan tomak,” nia dehan.

Iha fatin hanesan, Diretór Engeñeria no Operasaun Timor Telecom, Francisco de Jesus Leite, hateten vizita ne’e hodi haree filafali kooperasaun ne’ebé durante ne’e iha entre Governu no empreza telekomunikasaun ne’e.

“Ohin ami esplora barak liu kona-ba kooperasaun Timor Telecom no RTTL. Ami utiliza torre no fó espasu ba sira hodi halo transmisaun direita iha fatin-fatin,” nia tenik.

Diretór dehan, kona-ba dijitalizasaun, Timor Telecom prontu halo diskusaun kle’an ho jerente empreza estatál inklui tékniku sira hosi Xina hodi parte rua bele haree posibilidade balun ne’ebé bele halo.

Iha biban ne’e, Timor Telecom hakarak fasilita rede hodi bele kobre to’o munisípiu.

“RTTL harii ninia rede transporte rasik hodi utiliza sira-nia torre, nune’e bele halo emisaun ba rádiu no televizaun ba munisípiu hotu. Tanba ne’e, ami sei haree liu ba kestaun rede transporte,” dehan Diretór ne’e.

Kestaun seluk maka operadór telekomunikasaun ne’e sei apoiu RTTL iha dezenvolvimentu dijitalizasaun.

“Iha fatin barak ne’ebé maka indika torre Timor Telecom, entaun ita koopera iha ne’e, em vez de harii fali torre foun. Ne’e hanesan opsaun nakloke hela no ami diskute ona maibé to’o agora seidauk iha resposta,” nia informa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here