ai mangrove. Imajen/Google

LIQUIÇÁ, 08 outubru 2020 (TATOLI) – Sekretáriu Estadu Peska (SEP) Ilídio de Araujo, hateten, Suku Ulmera, Postu Administrativu Bazartete, Munisípiu Liquiçá,  tama iha area protejida ba diversidade ambientál. Tanba ne’e, nia husu ba komunidade iha área ne’ebá tenke kuidadu no labele estraga ai-mangrove ne’ebé moris iha tasi ninin.

Notísia Relevante : Sekretáriu Estadu na’in-tolu kuda mangrove iha Ulmera

“Ulmera ne’e tama iha área protejida, komunidade iha fatin ne’e labele estraga ai-mangrove ne’ebé ita kuda no balu ne’ebé moris boot ona, ai sira ita hateke ba tasi-ibun sanak maran hotu ne’e tanba saida, tanba komunidade iha ne’e ke’e ai nia hun hodi hasai ular iha ne’ebá hodi kail ikan ne’e mak ai sira ne’e balu mate hotu ne’e,” dehan Ilídio iha nia intervensaun bainhira kuda ai-oan mangrove iha Ulmera, ohin.

Nia dehan, governu esforsu hela atu kria lei hodi kontrola no labele autoriza ona komunidade peska ikan iha tan área protejida ne’e.

Iha fatin hanesan Xefe Suku Ulmera, Martino Correia hateten, deklarasaun hirak ne’ebé SEP fó sai hanesan autoridade lokál iha área refere sei tau hanesan konsiderasaun hodi kontrola komunidade labele estraga mangrove ne’ebé moris iha tasi ninin.

“Liafuan sira ne’ebé mak Sekretáriu Estadu Peska ko’alia hanesan responsabilidade boot ida mai ami hodi bele asegura ai-oan mangrove ne’ebé ita kuda,” hateten Xefe Suku Martino Correia.

Nia promete sei orienta komunidade sira iha fatin ne’ebá hodi tau-matan no kontrola ai-oan mangrove ne’ebé foin kuda atu ema labele estraga.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here