Diretór Institutu Defeza Nasionál (IDN), Kapitaun-de-Mar-e-Guerra, Donaciano Costa Gomes “Pedro Klamar Fuik” entrega prenda ba Tenente Koronél Martin Dransfield, ne’ebé termina ninia misaun iha TL. Imajen/IDN-TL

DILI, 08 outubru 2020 (TATOLI)- Tenente Koronél, Martin Dransfield hosi forsa Nova Zelándia, ne’ebé tinan barak fó apoiu ba dezenvolvimentu rekursu umanu iha Komandu FALINTIL-Forsa Defeza Timor-Leste (F-FDTL) ofisiálmente termina ninia misaun servisu iha Timor-Leste.

Diretór  Institutu Defeza Nasionál (IDN),  Kapitaun-de-Mar-e-Guerra, Donaciano Costa Gomes “Pedro Klamar Fuik”  hato’o agradese ba kooperasaun servisu barak ne’ebé Tenente Koronél, Martin Dransfield  halo hodi ajuda Komandu F-FDTL inklui sai dosente hodi hanorin iha IDN.

“Obrigadu barak ba dosente Koronél Martin Dransfield mai hamutuk ona ho ami iha IDN.  La iha buat espesiál ida IDN oferese ba ita boot. Maibé IDN agradese iha relasaun di’ak ne’ebé ita harii ona  ba ema barak nia di’ak sei hamutuk ho ita to’o bainhira de’it,” dehan Pedro Klamar Fuik  iha serimónia despedida  ne’ebé hala’o iha salaun enkontru IDN, Palásiu Governu, Dili.

Tenente Koronél Martin Dransfield durante ne’e hala’o knaar hanesan mós Asesór Estratéjiku ba Xefe Estadu Maiór Jenerál FALINTIL-Forsa Defeza Timor–Leste (F-FDTL), Majór Jenerál Lere Anan Timur.

Martin Dransfield mós durante ne’e sai dosente ba IDN hodi hanorin matéria operasaun apoiu ba Paz ba Alunu Kursu Promosaun Ofisiál ba 5o (CPOS hamutuk ema na’in-28  kompostu hosi Kapitaun F-FDTL na’in 20 no Inspetór Xefe Polísia na’in-ualu (8).

Pedro Klamar Fuik  konsidera Martin Dransfield hanesan amigu di’ak ba povu no n Timor-Leste, tanba hala’o hosi dame  Nasoins Unidus (UN), misaun INTERFET, kontinua ba fali misaun PKF  to’o sai asesór estratéjiku ba Xefe Estadu Maiór F-FDTL.

Diretór IDN ne’e mós agradese durante funu Timor-Leste nian militár no jornalista Nova Zelándia balun mate iha Timor-Leste.

“Ita boot nia militares sira moris iha Nova Zelándia, mate iha ne’e (Timor-Leste). Sira mate ba ema Timor, no  ami nia forsa natureza Timor sei proteje sira-nia klamar. Ita boot ema ne’ebé brani tanba ba dala-tolu ona,  ita boot mai ne’e kumpre misaun ONU iha nasaun ne’e. Asaun hirak ne’e  tanba ita boot hadomi povu iha nasaun Timor -Leste,” nia hateten.

Iha fatin hanesan, Tenente Koronél Martin Dransfield  dehan, sente kontente no onradu bainhira Diretór IDN ho ekipa konvida ba hanorin  iha IDN kona-ba  operasaun apoiu ba Pas ba 5o  CPOS iha IDN.

“Ha’u servisu iha Timor -Leste durante tinan-neen ona, ha’u hahú misaun iha tinan 2000 bainhira ha’u sai hanesan Komandante Batallaun husi Nova Zelándia no ha’u servisu hamutuk ho Diretór IDN, Pedro Klamar Fuik altura sei hanesan Komandante Komponente Navál iha Fronteira Covalima, hafoin misaun remata ha’u fila ba ha’u nia Nasaun.   Ha’u fila fali iha 2011 no 2012,  ami iha oportunidade fó kursu barak kona-ba operasaun paz no lei marítima,”  Tenente Koronél Martin Dransfield   hateten.

Nia dehan, Forsa Nova Zelándia sente orgullu no akompaña progresu servisu barak maka hala’o ona iha Komandu F-FDL.

Tuir nia haree katak, formasaun ne’ebé IDN realiza hodi halibur membru F-FDTL no PNTL ne’e importante tebes. Tanba iha Nova Zelándia mós harii sentru formasaun ho naran Command Staff College (CSC) ne’ebé konvida militár hosi nasaun Xina, Japaun no rai seluk hodi fahe ba alunu sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here