Komandante PNTL Munisípiu Bobonaro, Superintendente Xefe, Octávio de Araújo Bucar. Imajen Tatoli/Antonio Goncalves

DILI, 08 outubru 2020 (TATOLI)-Labarik ida ho idade menór (15) kondús motor Revo  ho númeru matrikula 7742 soke sarani lubun ne’ebé halo hela prosesaun lori ilas Na’in Feto  iha Postu Administrativu Balibo, Munisípiu Bobonaro.

Akontesimentu iha loron 5 outubru, foin lalais ne’e, purvolta tuku 19:15 Otl, halo sarani sira ne’ebé akompaña prosesaun ilas Na’in Feto trauma no ta’uk. Basa, asidente tráfegu ne’e rezulta sarani na’in- ualu kanek no tenke evakua kedas ba Sentru Saúde Balibo hodi hetan tratamentu intensivu.

Komandante Polísia Munisípiu Bobonaro, Superintendente Xefe, Octávio de Araújo Bucar, ohin, informa ba Agência Tatoli katak, akontesimentu ne’e envolve labarik ida ho inisiál JC, tinan 15, hosi Postu Administrativu Balibo, Munisípiu Bobonaro, kondús motorizada hodi soke sarani sira ne’ebé hala’o hela prosesaun ba ilas Na’in Feto.

“Suspeitu kondús hela motor hosi ninia uma iha área Merkadu Balibo atu ba Bairru-Berame, Aldeia Amandato, Suku Balibo, maibé to’o iha Bairru-Minaren, suspeitu soke sarani sira ne’ebé halo hela prosesaun lori ilas Na’in Feto,” haktuir Superintendente Xefe, Octávio de Araújo Bucar, liuhosi konfirmasaun telefone.

Vítima na’in-ualu ne’ebé hetan kanek maka Cristovão Colombus, tinan 12, Isabel Euvariza, tinan 15, Rosário Maia, tinan hitu, Jeraldo Maia, tinan 12, Saturnina dos Santos, tinan 64, Libania dos Santos, tinan 60, Alfredo dos Santos, tinan hitu, ho Jeferino Luis, tinan 14.

“Polísia halo kedas atuasaun hodi detein suspeitu, no prosesu la’o hela Superintendente Xefe, Octávio de Araújo Bucar hateten.

Iha sorin seluk, Enfermeira Helena de Oliveira Maia, hosi Sentru Saúde Balibo, informa, vítima sira evakua ba Sentru Saúde Balibo iha tuku 21:20 Otl; hodi halo tratamentu saúde.

Nia parte rejista pasiente hamutuk na’in-sia, maibé na’in-ualu sofre kanek kmaan hanesan fitar iha liman no ain, no na’in ida maka hetan kanek grave iha ulun ho suku pontu haat no liman naksalak.

“Ida ne’ebé kanek iha ulun ne’e nia liman mós naksalak, tia ida ho tinan 60 ne’e nia ain  mak naksalak de’it, no sira seluk inklui suspeitu ne’e mós hetan fitar de’it,” nia informa asuntu bainhira Tatoli halo konfirmasaun via telefone.

Pasiente hirak hafoin tratamentu fila kedas ba uma. “Pasiente ida kanek iha ulun, horiseik, mai halo kurativu nia kondisaun di’ak hela,” nia dehan.

Hosi sorin seluk, Padre Vigáriu Parókia Santo António, Arun Eca, rekoñese kazu ne’e akontese duni bainhira sarani sira iha Bairru-Minaren hala’o hela prosesaun Na’in Feto atu ba tama komunidade nia uma hodi abertura fulan tersu nian ne’ebé Igreja Katólika iha mundu tomak dedika espesiál iha outubru hodi reza tersu ba Na’in Feto.

 Jornalista : Agapito dos Santos

Editór        : Francisco Simões

HAKEREK NO HATÁN

Please enter your comment!
Please enter your name here