Primeiru-Ministru, Taur Matan Ruak. Imajen Tatoli/Egas Cristovão

DILI, 08 outubru 2020 (TATOLI)—Negosiasaun projetu Greater Sunrise entre Timor-Leste no parseiru daudaun ne’e la’o hela iha nível bilaterál no trilaterál.

Primeiru-Ministru (PM), Taur Matan Ruak, hateten atu dezenvolve kampu petrolífera presiza kontribuisaun parte hotu.

“Hakarak ka lakohi tenke dezenvolve maibé infelizmente ko’alia kona-ba Greater Sunrise dala-ruma ha’u sei eskola karik, maibé ha’u-nia fuk-mutin ona mós seidauk bele realiza. Espera katak ha’u-nia jerasaun mai sei hetan rezultadu maibé atu realiza povu tomak tenke serbisu maka’as hodi dezenvolve rekursu ho hanoin katak osan ne’ebé mai hosi rekursu ne’e bele lori benefísiu ba ita tomak liuliu jerasaun foin-sae sira,” tenik PM Taur iha resintu Parlamentu Nasionál (PN), kinta ne’e.

Governu daudaun serbisu maka’as atu dada kadoras mai Timor-Leste no iha tempu hanesan tau atensaun ba folin mina iha merkadu globál no rai-laran.

“Ita asina ona akordu ho Austrália no halo serbisu lubuk ida no kontinua ambisaun hakarak lori kadoras maibé tau atensaun maka’as loos ho redusaun folin mina-rai, tanba iha tinan hirak liubá bidon ida ho folin $114, maibé iha situasaun COVID-19 nia laran bidon ida tun ba $20,” nia realsa.

Xefe ezekutivu espera folin mina iha tempu tuir mai bele fila ba normál hodi fó benefísiu ba povu tanba fontes únika Estadu maihosi mina.

Tinan ne’e finaliza ona konseitu dezenvolvimentu kampu petrolífera no Estadu halo ona kontratu ho Austrália no kompañia konsórsiu sira, inklui Timor Gás no Petróleu, Empreza Públika (Timor GAP,E.P), nune’e iha fulan-neen nia laran bele finaliza rejime kontratuál no fiskál ba projetu kampu Greater Sunrise.

Hafoin Governu Timor-Leste no Austrália troka nota diplomátika kona-ba tratadu fronteira marítima no entra ein vigór 30 agostu 2019, Estadu Timor-Leste liuhosi Autoridade Nasionál Petróleu no Minerál (ANPM) hala’o negosiasaun ho Austrália no kompañia sira hodi finaliza konseitu dezenvolvimentu kampu.

Ba kestaun ne’e, Estadu rua halo negosiasaun hodi iha konkordánsia mak bele hala’o esplorasaun ba kampu petrolífera tanba media line ne’ebé fahe fronteira, balun tama iha área jurizdisaun Austrália.

Iha prosesu negosiasaun antes ne’e, bainhira kadoras dada mai Timor-Leste sei a-favór porsentu 70 no Austrália hetan porsentu 30, enkuantu bainhira dada ba Austrália a-favór porsentu 20 no ba Timor-Leste porsentu 80.

Iha tinan 2019, Conocophilips fa’an asaun konkórsiu projetu Greater Sunrise ba Timor-Leste ho kustu millaun $350 (ekivalente prosentu 30 husi totál), ne’ebé kontratu partilla iha produsaun 03-19 no 03-20.

Nune’e mós, sosa tan asaun Shell Energy nian ho kustu millaun $300, ne’ebé reprezenta porsentu 26,6.

Tanba ne’e daudaun, Timor-Leste iha partisipasaun másimu iha konsórsiu projetu Greater sunrise (reperezenta hosi Timor GAP) ho Partisipasaun hamutuk porsentu 56,56, Woodside (operadór) ho porsentu 33,4 no Osaka Gás reperzenta porsentu 10.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here