Prezidente Partido Democrático (PD), Mariano "Asanami" Sabino. Imajen/Antonio Goncalves

DILI, 08 outubru 2020 (TATOLI)-Deputadu Mariano Asanami Sabino, hosi Bankada Demokrátiku (PD) husu ba Governu Konstituisaun daualu atu mantein uza Planu Estratéjiku Dezenvolvimentu Nasionál (PEDN) hodi halo dezenvolvimentu infraestrutura.

PD ka’er nafatin prinsípiu katak prontu  apoia hodi hakotu impase polítika, normaliza ekonomia, normaliza funsionamentu instituisaun demokrátika no normaliza diálogu entre líder sira.

Notísia Relevante :PN aprova ona OJE 2020 iha finál globál

“Ho ida ne’e Partidu Demokrátiku fó apoiu ba orsamentu 2020 atu kontinua no halo ramata ba dezenvolvimentu infraestrutura hanesan eletrisidade, bee-moos, estrada ne’ebé mak seidauk hotu. Mantein Planu Estratéjiku Dezenvolvimentu Nasionál para hakotu infraestrutura nasionál,” dehan Asanami hafoin fó votu afavór ba proposta-lei OJE 2020 iha plenária, kinta ne’e.

Aleinde ne’e, nia husu Governu kontinua implementa polítika desentralizasaun ho objetivu maka atu hakbesik ukun ba povu nune’e mós povu ne’e besik liután ho ukun.

Nia rekomenda ba Governu atu apoiu liliu ba autoridade lokál hanesan  xefe suku sira, xefe aldeia sira, konsellu suku no mós estrutura munisipál hodi aselera deskonsentrasaun no desentralizasaun administrativa nune’e dezenvolvimentu iha área rurál bele la’o maka’as no la’o di’ak liután.

Nune’e mós Prezidente PD ne’e husu ba Governu atu investe maka’as liután iha área saúde, edukasaun, agrikultura iha ámbitu prosesu konstrusaun Estadu no Nasaun.

PD nafatin fó apoiu ba modernizasaun sosiedade Timor-Leste nune’e funsionamentu instituisaun husi nasionál to’o baze tenki serví di’ak liután atu nune’e povu bele kompriende no hatene informasaun kona-ba prosesu dezenvolvimentu ne’ebé la’o iha rai-laran.

Jornalista: Evaristo Soares Martins

Editór: Cancio Ximenes   

HAKEREK NO HATÁN

Please enter your comment!
Please enter your name here