Xefe Estadu Maiór F-FDTL Majór Jenerál Lere Anan Timur. Imajen Tatoli/António Goncalves

DILI, 08 outubru 2020 (TATOLI)- Xefe Estadu Maiór Jenerál FALINTIL-Forsa Defeza Timor–Leste (F-FDTL), Majór Jenerál Lere Anan Timur, defende konseitu polítika no esforsu Komandante ein-Xefe FALINTIL, Kay Rala Xanana Gusmão nian, kona-ba  dada kadoras mina matan  Greater Sunrise (GSR) mai Timor-Leste.

Notísia Relevante : FRETILIN Preokupa Prosesu Dada Kadoras

Jenerál Lere nu’udar mós veteranu ida dehan, polítika atu dada kadoras Greater Sunrise ne’ebé Xanana Gusmão luta durante funu to’o agora, nu’udar interese nasionál ne’ebé sei fó benefísiu ba futuru ekonomia nasaun no hadi’a povu nia moris.

“Uluk iha ai-laran, katuas Xanana dehan, demokrasia la signifika katak, ema hotu- hotu deside, maibé ema ida de’it bele deside ba interese  nasionál nasaun nian no ema barak nian mós, tanba ita serve ita-nia povu no serve ita-nia nasaun,” dehan Jenerál  Lere, ohin, iha reuniaun inter ministeriál hodi sensibiliza formatu servisu kriasaun  Autoridade Marítima Nasionál (AMN) iha salaun enkontru Kuartél Jenerál F-FDTL, Fatuhada, Dili.

Lere dehan, “ohin loron ita-nia impase polítika ne’e, porezemplu kona-ba ita nia mina-rai, lider balun dehan katak, ba Austrália, lider balun dehan, dada mai Timór, mais ita la iha konsensu. Mina ne’e interese nasionál ida ne’ebé sagradu no boot liu ba povu nia di’ak no ba nasaun nian di’ak.”

Lere dehan, atu lori kadoras mai Timor-Leste tenke kria estabilidade polítika  entre lider polítiku sira hodi tau aas interese nasaun no tau aas povu nia moris di’ak  mak importante liu.

Nia hatutan, liña fronteira marítima Timor-Leste nian, ohin loron, abandona hela, no seidauk koloka forsa atu ba halo seguransa, tanba estabilidade polítika iha rai-laran afeta servisu hotu-hotu la’o paradu.

Notísia Relevante : Governu Hakarak Mantein Polítika Xanana Dada Kadoras Mai Timor-Leste

“Ita nia rikusoin mina Greater Sunrise agora seguransa la iha, tanba ne’e ita nia governu no Estadu tenke konsensu haree ba kestaun interese nasionál ida ne’e,” nia husu.

Nia hatutan, fronteira tasi Timor-Leste manan tiha ona, tanba ne’e hosi ba lider polítiku sira tenke fó liman ba malu atu solusiona impase ne’e.

Tuir nian, bainhira krize polítiku rai-laran la rezolve, sei afeta ba futuru nasaun ne’e. “Ita tenke hamutuk, labele halo impase polítiku dada ba dada mai. Se Timór hanesan ne’e nafatin, ita nia esforsu hotu-hotu sei la vale no sei monu hotu ba rai,” Lere hateten.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here