Inspesaun konjunta entre AIFAESA, OMS no MS iha Loron Mundiál Ai-han Seguru. Dili, 07 juñu 2020. Imajen/Dok.Mídia-AIFAESA

DILI, 08  outubru 2020 (TATOLI)- Inan-oan nu’udar na’in ba loja fa’an nesesidade báziku ida iha Dili, ho inisiál  arguida JXP no arguidu MAG, kuarta horiseik,   tenke ba hatán iha Tribunál Distritál Dili  (TDD) tanba hadau fali dokumentu Autoridade Inspesaun Fiskalizasaun Ekonomia Sanitaria Alimentár (AIFAESA) bainhira ekipa AIFAESA ba halo notifikasaun  ba infrasaun balun ne’ebé loja na’in sira komete iha relasaun ho produtu ne’ebé sira fa’an liu prazu (expire).

Iha 26 setembru 2019, tuku 09:30 to’o 10:00 Otl, ekipa   AIFAESA halo inspesaun ba loza refere hetan produtu barak maka liu ona prazu (expire). Ho nune’e, ekipa ne’e entrega dokumentu ba arguidu sira asina atu rekolla produtu sira ne’e, maibé arguida sira rekuza asina no arguidu sira hadau tiha dokumentu refere no lakohi devolve.

Arguida ho arguidu sira kontinua diskute  malu ho ekipa AIFAESA tanba ne’e ekipa husu apoiu ba Polísia hodi akompaña ba iha arguidu sira nian loja, kontinua ho programa rekolla produtu hirak ne’e, maibé arguidu sira nafatin lakohi koopera hodi halo impedimentu no diskusaun ho Polísia no AIFAESA.

Iha altura ne’ebá arguida ho arguidu halo lakon tiha dokumentu apreensaun hosi ekipa AIFAESA no subar tiha evidénsia kona-ba produtu hirak ne’ebé nia prazu liu ona. Maske nune’e, ekipa AIFAESA ho Polísia konsege hetan no prende produtu balun ne’ebé identifikadu expire ona.

Ho ida ne’e bazeia ba mandadu buska no apreensaun konsege prende tan produtu sira hanesan iha auto apreensaun.

Arguida JXP ho arguidu MAG komete krime ne’e ho livre delibarada no konsientemente, hatene katak bainhira sira tau sasán ka produtu sira ne’ebé ho prazu liu iha sira nian loza atu ema sosa, nu’udar meiu aptu bele hamosu perigu ba konsumidór sira -ian vida, maibé arguidu sira halo nafatin hodi kontra Lei.

Arguida ho arguidu mós hatene katak, bainhira ekipa AIFAESA halo inspesaun ba iha sira-nia loja atu rekolla produtu sira ne’ebé prazu liu, maibé arguidu ho arguida impede hodi la konsege rekolla hotu produtu sira, maske sira hatene katak sira-nia hahalok ne’e kontra lei maibé sira halo nafatin.

Tanba ne’e konstitui arguida JXP ho arguidu MAG hanesan ko-autoria materiál ba konkursu krime fa’an produtu adulteradu, ka deterioradu no mós obstrusaun ba autoridade públiku ne’ebé previstu no punidu tuir artigu 214 no mós artigu 243, konjuga ho artigu 30 no mós 35 hotu hosi kódigu penál.

Liu hosi audiénsia julgamentu  sasin ho inisiál TMR no EMP konfesa katak, hanesan funsionáriu AIFAESA iha inspesaun  momentu sira nia parte primeiru tama iha loja  refere no iha inspetór ida mak ba aprosima ho loja na’in hodi autoriza ekipa inspesaun ne’e tama ba loja laran.

Nia dehan, loja na’in fó autoriza sira-nia ekipa hodi halo inspesaun, tanba kumpre lei númeru 14/2016, kona-ba rejime kontrolu tabaku.

Nia fó sasin katak, bainhira tama iha loja laran hetan uluk mak tabaku ka sigarru ilísitu, ne’ebé rai hela iha fatin kasir  nian, hanesan Surya 12 masu 20, Marlboro mentól masu 10, inklui bebída sprite botir neen liu ona prazu.

“Ami la konsege halo apreensaun ba sasán sira-ne’e, tanba loja na’in  ko’alia ho emosaun no hatudu liman ba ami, dehan sasán sira ne’e labele foti, no dehan ami autonomia,” nia dehan.

Nia informa, ekipa AIFAESA konsege hasai de’it  imajen ba tabaku ilísitu hirak ne’e, maibé kona-ba bebída sprite ne’e la konsege tanba na’in ba loja  foti ba tau tiha lixu fatin.

Rona tiha  parte sira ne’e, Tribunál  adia  fila-fali  julgamentu ba iha loron 21 outubru, tinan ne’e, iha tuku 14:00 Otl, hodi rona sasin seluk.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here