espoza Prezidente Repúblika (PR) Cidalia Nobre Mouzinho Guterres sai Embaixadora ba Plan Internasional iha Timor-Leste. Imajen TATOLI/Osoria Marques.

DILI, 08 outubru 2020 (TATOLI)–Iha selebrasaun ba Loron Internasional Ba Labarik Feto, Plan Internasional halo lansamentu ba programa ida naran “TATOLI” hodi hili no fó konfiansa tomak ba espoza Prezidente Repúblika (PR) Cidalia Nobre Mouzinho Guterres sai Embaixadora ba Plan Internasional iha Timor-Leste (TL).

Espoza Prezidente Repúblika (PR) Cidalia Nobre Mouzinho Guterres hateten, Plan Internasional fó konfiansa tomak ba nia sai Embaixadora tanba ho objetivu atu hakbesik-aan ba labarik feto sira liuhosi programa “TATOLI” ba Cidalia.

“Objetivu programa TATOLI ba Cidalia ne’e halo kampaña oinsá fó apoiu kona-ba trava labarik feto sira isin rua sedu no abuzu hasoru labarik feto iha Timor-Leste. Tanba ne’e, ha’u iha espetativa ida oinsá liuhosi programa ne’e atu rona no hatene liuliu kona-ba situasaun ne’ebé mak oan feto ka inan-feton sira hasoru liga ba abuzu no ba problema sosiál ne’ebé mak sira hasoru,” dehan Cidalia Nobre Mouzinho Guterres ba jornalista sira iha Otél Novu Turizmu, Lecidere, Dili, kinta ne’e.

Nia dehan, problema ne’ebé agora sai fenomenal iha Timor-Leste maka soe bebé no labarik feto sira sai inan idade sei minoridade, liga ba saúde no mós sira seluk hanesan abuzu iha uma laran no mídia sosiál. Maibé hosi problema sira-ne’e balu maka hetan ona atendimentu maibé barak mak la hatene dalan entaun sai vítima nafatin.

“Entaun programa TATOLI ba Cidalia ne’e ho nia vontade tomak, ha’u hakarak labarik feto sira ne’ebé mak iha problema bele hato’o liuhosi karta ruma mai iha ami-nia Gabinete hafoin maka ami deside loron, hasoru imi atu ita hotu haree problema ba oin to’o final,” nia dehan. 

Embaixadora ne’e dehan, problema hotu-hotu iha solusaun, importante mak hatene atu hato’o ba sé no tenke brani ko’alia sai.

“Ida-ne’e mak ha’u-nia espetativa espera katak maluk sira ne’ebé presiza tebes tulun bele hato’o ba programa TATOLI ba Cidalia, Plan Internasional, Governu ami sei haree hamutuk,” nia dehan.

Nia afirma, programa TATOLI ba Cidalia ne’e sei hala’o tuir mandatu Governu nian ba durante tinan tolu.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here