Xefe Bankada CNRT, Duarte Nunes. Imajen/Egas Cristovão

DILI, 08 outubru 2020 (TATOLI)-Bankada Congresso Nacionál da Reconstrução de Timorense (CNRT) la fó votu favorável ba proposta  Orsamentu Jerál Estadu (OJE) 2020 tanba ezekusaun foin atinje 48.4%.

“VIII Governu “defaktu” ninia kapasidade fraku iha ezekusaun OJE 2020 tanba atinje de’it 48.4 porsentu no sei iha saldu millaun $690,27, maibé Governu hakarak dada hotu osan hosi fundu petrolíferu,” Xefe Bankada CNRT, Deputadu, Duarte Nunes, informa kestaun ne’e liuhosi komunikadu imprensa ba Agência TATOLI, kinta ne’e.

Notísia Relevante :Xefe Governu agradese PN aprova OJE 2020 iha finál globál

Nia dehan “Tuir loloos ita husik osan hirak ne’e hodi investe iha merkadu finanseira, nune’e sei fó-retornu ba konta fundu petrolíferu, liliu iha situasaun ne’ebé ita sei depende hela ba fundu soberanu ida-ne’e. Tanba ne’e bankada CNRT la fó votu favorável ba proposta-lei OJE 2020,”.

Bankada CNRT teknikamente kontribui ona hodi hadi’a OJE no haree katak Governu Konstitusionál daualu labele ezekuta orsamentu ne’e durante fulan-rua nia laran.

“CNRT vota kontra iha finál globál tanba lakohi atu Kontribui ba hahalok gasta osan arbiru ne’ebé Governu “defaktu” ida-ne’e sei komete,” nia dehan.

Ho pontu hirak ne’e Bankada CNRT hakarak afirma ninia pozisaun la admite Governu ne’ebé lidera husi Primeiru-Ministru, Taur Matan Ruak ne’ebé laiha lejitimidade konstitusionál atu aprezenta Orsamentu Jerál Estadu.

Bankada CNRT mós  la admite ezisténsia VIII Governu ne’ebé moris hosi violasaun ba konstituisaun no konsolida liuhosi hahalok “asaltu podér” iha Parlamentu Nasionál.

Ho CNRT nia pozisaun vota kontra final globál, CNRT Ejize  ba Tribunál Rekursu atu pronúnsia konstitusionalidade no legalidade ba Orsamentu Jerál Estadu 2020.

Maski CNRT vota kontra ona proposta-lei OJE 2020 maibé promete katak sei kontinua akompaña ezekusaun, tanba osan hirak ne’e maihosi povu no na’in loloos mak povu.

Notísia Relevante :PN aprova ona OJE 2020 iha finál globál

 Jornalista: Evaristo Soares Martins

 Editór: Cancio Ximenes

HAKEREK NO HATÁN

Please enter your comment!
Please enter your name here