Prezidente Repúblika, Francisco Guterres Lú Olo, tula deviza ba Higino das Neves nu'udar kapitaun-fragata, iha serimonia komemorasaun loron FALINTIL ba dala 43 iha kuartel jerál Fatuhada. Imajen Tatoli/Dok

DILI, 08 outubru 2020 (TATOLI)-Komandu FALINTIL-Forsa Defeza Timor-Leste (F-FDTL) liuhosi Autoridade Marítima Nasionál Timor-Leste (AMN), ohin, hala’o reuniaun interministeriál hodi sensibiliza formatu servisu no estrutura orgánika ba kriasaun AMN tuir dekretu lei númeru 39/2020, de 23 de setembro.

Notísia Relevante : Kria Autoridade Marítima Atu Poupa Rekursu no Materiál

Introdusaun ba knaar servisu AMN ne’e aprezenta direita hosi Kapitaun-de-Mar-e-Guerra, Higino da Neves, partisipa direita hosi Xefe Estadu Maiór Jenerál FALINTIL-Forsa Defeza Timor–Leste (F-FDTL), Majór Jenerál Lere Anan Timur, Vise Xefe Estadu Maiór Jenerál F-FDTL, Brigadeiru Jenerál Falur Rate, Xefe Estadu Maiór F-FDTL, Koronél Calisto Santos Coli “Coliati”, asesora no kargu xefia liña ministerial sira.

Majór Jenerál Lere Anan Timur dehan, kriasaun AMN ne’e importante tebes envolve liña ministerial hotu hodi halo servisu konjunta kontrola rikusoin Timor-Leste iha tasi no kontrola liña fronteira marítima entre Timor-Leste, Austrália no Indonézia.

“Agora Autoridade Marítima Nasionál kria tiha ona, ita tenke tuur hamutuk para diskute dokumentu, regulamentu barak sei falta, ita bele tau idea hamutuk para diskute klaru ninia rejimentu sira ne’ebé sei falta hodi halo servisu bele la’o ba oin haree ba interese nasionál,” dehan Lere liuhosi nia diskursu iha Komandu F-FDTL, Fatuhada, Dili.

Lere dehan, mezmu Timor-Leste seidauk iha ekipamentu sufisiente, maibé importante Estadu iha polítika no vontade di’ak hodi investe ba AMN ne’ebé sei komanda direita hosi Komandu F-FDTL.

Nia dehan, rekursu mina-rai no rikusoin sira hanesan ikan no balada seluk iha tasi laran tenke próteze.

Jenerál Lere hatutan, Timor-Leste mós tenke kria kooperasaun militár di’ak no forsa nasaun viziñu Indonézia no Austrália ba oin bele servisu hamutuk halo patrullamentu iha fronteira terrestre no marítima nian.

Knaar Autoridade Marítima Nasionál ne’e rasik Prezidente Repúblika promulga ona envolve liña ministériu sira hanesan, Ministériu Defeza, Ministériu Interiór, Ministériu Turizmu no Komérsiu, Ministériu Agrikultura no Peska, Ministériu Justisa, Ministériu Finansas, Ministériu Petróleu no Minerais no Ministériu Saúde.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here