Sekretária Estadu Igualdade no Inklusaun, Maria Jose da Fonseca Monteiro de Jesus. Imajen Tatoli/ Egas Cristovão

DILI, 07 outubru 2020 (TATOLI)–Sekretária Estadu Igualdade Inkluzaun (SEII), Maria José Fonseca de Jesus, hateten SEII estabelese ona Sentru Empoderamentu ba Igualdade no Inkluzaun Sosiál (SEIIS) iha munisípiu sia (9). 

Notísia Relevante: SEII sei apoia grupu feto iha munisípiu 12 no RAEOA

“Ita mós estabelese ona sentru empoderamentu iha munisípiu sira hanesan Aileu, Ainaro, Bobonaro, Covalima, Ermera, Liquiça, Lautem, Manufahi, Viqueque no semana ne’e ita sei estabelese tan iha RAEOA,” dehan Maria José Fonseca de Jesus ba Agência TATOLI iha Resintu Parlamentu Nasionál, kuarta ne’e.

Nia hatutan, to’o agora munisípiu tolu (3) mak seidauk estabele mak hanesan Munisípiu Dili, Manatuto no Baucau maibé tuir planu sei estabelese tan iha fulan ne’e nia-laran.

“Munisípiu tolu sei estabelese iha fulan ne’e nia-laran no sei reforsa tan grupu traballu jéneru nian hodi hatutan ba programa balun ne’ebé mak SEII implementa ona iha munisípiu antes ne’e,”  nia dehan.

Durante ne’e, nia hateten, SEII iha pontu vogál ne’ebé mak hala’o servisu iha munisípiu sira maibé servisu la la’o tanba servisu munisípu barak liu.

“Ami iha pontu vogál ida de’it mak iha munisípiu sira hanesan Prezidente Autoridade ka Administradór maibé sira servisu barak entaun programa labale la’o maibé ho estabelesementu sentru empoderamentu ne’ebé mak sei foka liu ba programa SEII nian iha munisípu,” nia hateten. 

Governu liuhosi Sekretária Estadu ba Igualdade no Inkluzaun, Maria José da Fonseca Monteiro de Jesus, lansa ona estabelesimentu Sentru Empoderamentu ba Igualdade no Inkluzaun Sosiál (SEIIS) iha salaun administrasaun Munisípiu Bobonaro iha loron 24 jullu 2020 ho objetivu atu fasilita promosaun igualdade no inkluzaun sosiál iha munisípiu sira no iha RAEOA no fó apoiu ba servisu grupu traballu jéneru munisípiu no rejionál.

Foku prinsipál hosi SEIIS mak empoderamentu ekonómiku liuhosi fasilita no fó apoiu ba grupu benefisiáriu fundu transferénsia públika SEII nian hahú hosi tinan 2020 no sentru refere sei hatutan SEII nia servisu ba empoderamentu ekonómiku hanesan baze ba esforsu promosaun igualdade no inkluzaun tomak.

Liuhusi servisu Sentru Empoderamentu Igualdade no Inkluzaun Sosiál (SEIIS) ida-ne’e bele asegura grupu benefisiáriu sira ne’ebé hetan ona apoiu husi SEII hanesan poténsia bo’ot kontribui ba dezenvolvimentu iha nivel suku.

Sentru ne’e estabelese atu hamoris sentru baze iha munisípiu hodi bele fornese espasu ba halo koordenasaun, grupu sira atu uza oportunidade komunika ba malu, transforma maneira ba halo negósiu, dezeña atividade kreativu, organiza atividade ba promosaun igualdade no inkluzaun, inklui identifika problema ne‘ebé feto sira hasoru no buka solusaun ba problema hirak ne‘e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here