Governu ho Parlamentu Nasional Votasaun Proposta OJE 2020 iha debate faze Espesialidade, iha sala plenáriu PN, kuarta (07/10). Imajen Tatoli/Egas Cristovão

DILI, 07 outubru 2020 (TATOLI)—Parlamentu Nasionál, ohin, aprova ona proposta orsamentu hosi Ministériu Defeza ho montante millaun $21.494.

Orsamentu Ministériu Defeza inklui F-FDTL ho montante millaun $21.494 komposta hosi saláriu no vensimentu millaun $9.776, bens (sasán) no servisu millaun $11.718.

Hosi montante orsamentu millaun $21.494 ne’e koloka ba Ministériu Defeza millaun $4.840 ne’ebé fahe ba saláriu no vensimentu millaun $1.163, bens no servisu millaun $3.678.

Purtantu orsamentu ba FALINTIL-FDTL millaun $16.653 komposta hosi saláriu no vensimentu millaun $8.613 no bens no servisu millaun $8.040.

Reprezentante povu sira iha uma fukun Parlamentu Nasionál aprova orsamentu Ministériu Defeza nian ho rezultadu votasaun a-favór 43, kontra 0 no abstensaun 21.

“Ho nune’e orsamentu ba Ministériu Defeza no orsamentu ba FALINTIL-FDTL pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi debate espesialidade loron datoluk, iha plenária Parlamentu Nasionál, kuarta ne’e.

Bazea ba planu asaun anuál hosi Ministériu Defeza iha medida prinsipál setoriál ba 2020 mak dezenvolve, garante no salvaguarda  defeza nasionál, nomeadamente halo rekrutamentu ba membru foun, dezenvolve no mellora saúde jerál efetivu iha F-FDTL.

Nune’e mós partisipa ezersísiu kombinada iha ámbitu kooperasaun tékniku-militár no organizasaun internasionál, realiza operasaun hodi garante da estabilidade no seguransa, apoia populasaun no defeza rekursu naturál

Iha 2020 Ministériu Defeza ne’ebé lidera hosi Filomeno Paixão de Jesus sei dezenvolve no melloria kondisaun militár sira liuhosi manutensaun no rekuperasaun instalasaun militár, dezenvolve no melloria manutensaun meiu transporte no equipamentu, dezenvolve kapasidade interna manutensaun.

Ministériu Defeza ba tinan fiskal 2020 sei dezenvolve sistema base de dados ho di’ak iha lojístika, implementa polítika jéneru, promove boa governasaun, jestaun institusional iha ministériu no servisu hotu ne’ebé tutela ba ministériu refere.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here