DILI, 07 outubru 2020 (TATOLI)—Parlamentu Nasionál (PN) aprova ona orsamentu hosi Conselho de Imprensa ho montante valór rihun $605 ne’e sei finánsia atividade Conselho de Imprensa nian ne’ebé prevee ona iha planu asaun anuál.

Orsamentu ba Conselho de Imprensa (CI) ho montante rihun $605 ne’e fahe ba saláriu no vensimentu rihun $305, bens (sasán) no servisu rihun $300 no orsamentu ne’e aprova ho rezultadu votasaun a-favór 44, kontra 0 no abstensaun 21.

“Ho nune’e orsamentu ba Conselho Imprensa nian pasa iha espesialidade,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi debate espesialidade loron datoluk iha plenária Parlamentu Nasionál, kuarta ne’e.

Ezisténsia CI bazeia Lei komunikasaun Sosiál artigu 42 (natureza no independénsia) alínea 1 hateten, Conselho de Imprensa nu’udar entidade administrativu independente no hala’o ninia atribuisaun no mós kompeténsia la haktuir diretrís ka orientasaun sira podér polítiku nian.

Nune’e mós asegura asesu ba profisaun jornalista bazea ba observánsia kondisaun legál no asegura atividade jornalístika ne’ebé  dezenvolve ho profisionalizmu no respeita ba padraun étika sira.

Medida prinsipál setoriál hosi Conselho de Imprensa ba tinan fiskál 2020  garante liberdade espresaun no  asesu ba informasaun, dezenvolve parseria no diálogu entre operadór no komunikasaun sosiál,  dezenvolve mekanizmu no regulamentu própriu hodi halo supervizaun no mediasaun.

Aleinde ne’e, atu dezenvolve kompeténsia profisionál sira, téknika no intelektuál ba jornalista sira, promove estudu, diseminasaun informasaun no advokasia, implementa polítika jéneru no medida prinsipál ikus liu mak promove governasaun di’ak, jestaun institusionál no fortalese kapasidade rekursu umanu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here