Primeiru-Ministru, Taur Matan Ruak, hamutuk ho membru Governu sira defende Proposta OJE 2020 iha debate faze Espesialidade, iha sala plenáriu. Imajen Tatoli/Egas Cristovão

DILI, 07 outubru 2020 (TATOLI)—Parlamentu Nasionál, ohin, aprova ona orsamentu hosi Ministériu Solidariedade Sosiál no Inkluzaun (MSSI) ho montante $59,286,030 maibé montante ne’e hetan alterasaun ba millaun $56-resin

Hosi orsamentu $59,286,030 inklui  montante $44,514,756 ba Institutu Nasionál Seguransa Sosiál (INSS), ne’ebé dezenvolve liuhosi transferénsia públika.

Hosi montante orsamentu $59,286,030 hetan alterasaun no totál despeza hatun millaun $56-resin ne’ebé fahe ba saláriu no vensimentu $1,594,154, bens (sasán) no servisu $3,398,129, transferénsia públika $54,293,747. Purtantu MSSI iha 2020 laiha kapitál minór no kapitál dezenvolvimentu.

Hosi montante orsamentu $59,286,030 ne’e MSSI ezekuta ona balun hahú hosi janeiru to’o setembru. Entretantu resta orsamentu sei hahú ezekuta hosi outubru, novembru no dezembru tinan 2020.

Hosi montante orsamentu ne’e koloka ba Gabinete Ministra rihun $511, Gabinete Vise-Ministra rihun $225, Inspesaun no Auditoria Interna rihun $51, Diresaun Jerál Administrasaun Finansa rihun $30, Gabinete Estudu Planeamentu Dezenvolvimentu Institusionál rihun $34, Unidade Komunikasaun Sosiál no Protokolu rihun $56, Diresaun Nasionál Orsamentu, Jestaun Finanseira no Patrimoniál millaun $1.753, Diresaun Nasionál Administrasaun no Rekursu Umanu rihun $802, Diresaun Nasionál Asisténsia Sosiál millaun $7.761, Diresaun Nasionál Inkluzaun millaun $2.514 no Diresaun Jerál Solidariedade Sosiál no Inkluzaun Millaun $44.568.

Iha debate faze espealidade loron datoluk ne’e reprezentante povu sira aprova ho rezultadu votasaun a-favór 43 , kontra 7 no abstesau 12

“Ho nune’e orsamentu ba Ministériu Solidariedade no Inkluzaun pasa,” Prezidente Parlamentu Nasionál, Deputadu Aniceto Longuinghos Guterres Lopes, anunsia liuhosi plenária, kuarta ne’e.

Iha tinan 2020, Ministra Solidariedade Sosiál no Inkluzaun, Armanda Berta dos Santos prioritiza medida prinsipál sia (9) hodi garante governasaun di’ak (boa governasaun) durante tinan 2020.

Bazea ba Planu Aasaun anuál (livru 2), prioridade governasaun hosi MSSI mak bem-estar sosiál, protesaun sosiál, sidadania, inkluzaun, protesaun no dolidariedade sosiál (feto no labarik, grupu terseira idade, ema ho defisiénsia no vulnerável sira).

Hosi prioridade governasaun ne’e hamosu medida prinsipál setór hosi MSSI hamutuk sia (9) iha tinan 2020.

Medida prinsipál dahuluk mak instala no asegura  jestaun di’ak no fortalese sistema integradu protesaun sosiál, medida prinsipál daruak mak dezenvole inisiativa sira kona-ba asisténsia sosiál, datoluk promove no proteje direitu labarik sira.

Medida prinsiál dahaat no dalima mak kontribui kombate HIV/SIDA, promove reabilitatsaun sosiál ba akonsellamentu no rekuperasaun.

Medida prinsipál daneen mak asegura atendimentu ho kualidade ba sidadaun sira iha situasaun vulnerabilidade sosiál liuhosi implementasaun polítika protesaun sosiál, asisténsia sosiál, reabilitasaun no seguransa sosiál tantu nível nasionál no munisipál.

Medida prinsipál dahitu no daualu mak promove inisiativa reinsersaun, inkluzaun komunitária no implementa polítika jéneru.

Medida prinsipál setoriál ikus liu hosi MSSI iha tinan 2020 mak promove governasaun di’ak, jestaun institusionál iha servisu tomak ministériu nian, fortalese instituisaun no eleva kapasidade rekursu umanu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here